વલસાડ ખાતે ચોથી સ્ટેટ રેન્કિંગ ટેબલ ટેનિસ ટુર્નામેન્ટનું આયોજન

વલસાડ નગરપાલિકા સ્પોર્ટ્સ સંકુલ ખાતે ગુજરાત રાજ્ય ટેબલ ટેનિસ એસોસિએશનના નેજા હેઠળ વલસાડ ડિસ્ટ્રિક્ટ ટેબલ ટેનિસ એસોસિએશન દ્વારા ૪થી સ્ટેટ રેન્કિંગ ટેબલ ટેનિસ ચેમ્પિયનશિપનું ૫ સપ્ટેમ્બર થી ૮મી સપ્ટેમ્બર સુધી આયોજન કરવામાં આવ્યું છે. આ ટુર્નામેન્ટમાં ગુજરાતભરના ૫૩૫ ટેબલ ટેનિસ ખેલાડીઓ ભાગ લઇ રહ્યા છે.

આ ટુર્નામેન્ટમાં ગત વર્ષના ગુજરાતના નંબર-૧ ઇશાન હિંગોરાની પુરૂષ વિભાગમાં પુનરાગમન કરશે. તેમજ સુરતનો બીજો ક્રમાંકિત શ્લોક બજાજ પણ ભાગ લેશે, જેણે રાજ્યની 3જી રેન્કિંગમાં ત્રણેય કેટેગરીમાં જીત હાંસલ કરી ટ્રિપલ તાજ મેળવ્યો હતો. મહિલા વિભાગમાં સુરતની ટોચની ક્રમાંકિત બે પેડલર્સ - ફ્રેનાઝ ચિપિયા અને ફિલઝાહ કાદરી પણ સ્પર્ધામાં ભાગ લેશે. આ સ્પર્ધામાં તમામની નજર અમદાવાદની ૧૩ વર્ષીય પ્રથા પવાર પર રહેશે કે જે રાજ્યમાં ગર્લ્સની અંડર - ૧૫, ૧૭ અને ૧૯ કેટેગરીમાં ટોપ સીડ ધરાવે છે. પ્રથાએ તેની પ્રથમ આંતરરાષ્ટ્રીય મીટમાં ૧૪ ઓગસ્ટે જોર્ડનના અમ્માનમાં આયોજિત વર્લ્ડ ટેબલ ટેનિસ (WTT) યુથ સ્પર્ધાની ગર્લ્સ U-૧૫ કેટેગરીમાં બ્રોન્ઝ મેડલ જીત્યો હતો.

આ ટુર્નામેન્ટ ગુજરાત સ્ટેટ ટેબલ ટેનિસ એસોસિએશનના ખજાનચી અમિત ચોક્સી, વલસાડ ડિસ્ટ્રિક્ટ ટેબલ ટેનિસ એસોસિએશનના પ્રમુખ જીગર પટેલ અને સેક્રેટરી ભાવિન દેસાઈની દેખરેખ હેઠળ યોજાઈ રહી છે.

English summary

4th State Ranking Table Tennis Tournament organized at Valsad