મોદી ઉપરનો યુએસ વિઝા બેન ઉઠાવી લેવા ઝૂંબેશ

Updated: Saturday, February 7, 2015, 15:34 [IST]

શિકાગો, 13 સપ્ટેમ્બર : ગુજરાતના મુખ્યપ્રધાન નરેન્દ્ર મોદીને અમેરિકામાં પ્રવેશ માટે વિઝા આપવા પર મૂકાયેલા પ્રતિબંધને ઉઠાવી લેવા માટે ઝૂંબેશ ચલાવનારા અમેરિકી કોંગ્રેસમેન જૉ વૉલ્શે તાજેતરમાં જણાવ્યું હતું કે ખાસ કરીને હવે જ્યારે અમેરિકાની આર્થિક સ્થતિ નબળી છે ત્યારે અમેરિકાએ નરેન્દ્ર મોદી પાસેથી શીખવું જોઇએ.

અમેરિકામાં રિપબ્લિકન પાર્ટીના સાંસદ જૉ વૉલ્શે જણાવ્યું કે 'ભ્રષ્ટાચાર વિરોધી અને વિકાસ તરફી હોય તેવી સરકારી નીતિઓના પગલે દુનિયાભરમાં તેમણે નામના મેળવી છે. આ કારણે અમેરિકાએ તેમને વિઝા આપવા પર પ્રતિબંધ મૂકવાની જગ્યાએ ભાજપના અગ્રણી નેતાને આવકારવા જોઇએ.'

શિકાગો વિસ્તારના 8મા જિલ્લા ઇલિનિયોસના સાંસદ વૉલ્શે સેક્રેટરી ઓફ સ્ટેટ હિલેરી ક્લિન્ટનને પત્ર લખી મોદીને વિઝા આપવા પર મૂકવામાં આવેલા 7 વર્ષ જૂના પ્રતિબંધને ઉઠાવી લેવાની ઝૂંબેશમાં એક પગલું આગળ વધ્યા છે.