દરિયાઈ પાણીથી થતું ધોવાણ-નુકસાન અટકાવવા દિવાલ બનાવાઈ

Water Resources Minister Mukeshbhai Patel : ગુજરાત વિધાનસભા ગૃહમાં રાજુલાના ધારાસભ્ય દ્વારા દરિયાઈ પાણીથી થતા નુકસાન અટકાવવા તૈયાર કરાયેલી દીવાલ અંગે જળ સંપત્તિ મંત્રી મુકેશભાઇ પટેલને પ્રશ્ન પૂછવામાં આવ્યો હતો.

આ સવાલનો પ્રત્યુત્તર આપતા જળ સંપતિ રાજ્યમંત્રી મુકેશભાઈ પટેલે જણાવ્યું હતું કે, દરિયાઈ પાણીથી થતા ધોવાણ અને નુકસાનને અટકાવવા માટેની આ યોજના હેઠળ સેન્ટ્રલ વોટર એન્ડ પાવર રિસર્ચ સ્ટેશન-પુને દ્વારા તૈયાર કરાયેલી ડિઝાઇન મુજબ મુખ્યત્વે 10 થી 600 કિલોગ્રામ વજનના રબલ સ્ટોન પર આર્મર લેયર તરીકે 1 ટન વજનના કોન્ક્રીટ ટેટ્રાપોડ્સને ઇન્ટરલોકિંગ કરવામાં આવે છે.

અત્રે ઉલ્લેખનીય છે કે, આર્મરલેયર તરીકે કોન્ક્રીટ ટેટ્રાપોડ્સનો ઉપયોગ કરવાથી વધુ સારું ઇન્ટરલોકિંગ તેમજ સસ્ટેનેબિલિટી વધુ મળવાથી દરિયાઈ ધોવાણ અટકાવી શકાય છે.

મંત્રીએ વધુ વિગતો આપતા ઉમેર્યું કે, રાજુલા તાલુકાના ખેર ગામે દરિયાઈ પાણીથી થતું ધોવાણ-નુકસાન અટકાવવા માટે દિવાલ બનાવવામાં આવી છે. આ દીવાલ માટે માર્ચ-2019માં વહીવટી તેમજ સપ્ટેમ્બર-2020માં તાંત્રિક મંજૂરી આપવામાં આવી હતી. આ દિવાલ બનાવવાની કામગીરી રૂપિયા 811 લાખથી વધુના ખર્ચે ડિસેમ્બર 2023માં પૂર્ણ કરવામાં આવી છે.

મંત્રી મુકેશભાઇ પટેલ ઉમેર્યું કે, આ યોજનાથી રાજુલા તાલુકાના ખેર ગામમાં આશરે 150 જેટલા મકાનો, અંદાજે 30 હેક્ટર ખેતીની જમીન તેમજ અંદાજીત 630 મીટર લંબાઈમાં - દરિયાઈ સપાટીથી અંદાજે 7 મીટરની ઊંચાઈમાં દરિયાઈ ધોવાણ સામે રક્ષણ મળશે.

રાજુલા તાલુકાના ખેરા ગામની દરિયાઈ સીમામાં ધોવણ અટકાવવા 1680 મીટરની લંબાઈના કામ માટે રૂપિયા 22 કરોડના ખર્ચે ખેરા ફેઝ 2ની કામગીરીને સૈદ્ધાંતિક મંજૂરી આપવામાં આવી છે.

રાજુલા તાલુકાના ખેરા ગામમાં સૂચિત ખેરા ફેઝ 2નાં કામથી અંદાજે 60 હેક્ટર ખેતીની જમીન અને અંદાજે 200 રહેણાંક મકાનોને દરિયાઈ ધોવણથી રક્ષણ મળશે, તેમ તેમણે ઉમેર્યું હતું.

English summary

Water Resources Minister Mukeshbhai PateL said A wall was built to prevent erosion by sea water