બારમાંથી પકડાયેલા 250 યુવાનો પોલીસ કસ્ટડીમાંથી ભાગ્યા

Published: Saturday, October 27, 2012, 14:48 [IST]

મુંબઇ, 27 ઑક્ટોબર : રાત્રે જાગતા શહેર મુંબઇમાં આશ્ચર્ય પમાડે તેવી ઘટનામાં પોલીસ કસ્ટડીમાંથી 250 લોકો એક સાથે ભાગી ગયા હતા. આ ઘટના શુક્રવારે રાત્રે બની હતી.

દક્ષિણ મુંબઇમાં પોલીસે શુક્રવાર 26 ઑક્ટોબરની રાત્રે એક બારમાંથી 250 યુવાનોને પકડ્યા હતા. આ યુવાનોને પોલીસ સ્ટેશન લઇ જવામાં આવ્યા હતા. પોલીસ સ્ટેશનમાં કેટલાક વગદાર યુવાનોએ પોલીસ સાથે પોતાને છોડી દેવાની ઉગ્ર રજૂઆત કરી હતી.

આ દરમિયાન એક વકીલે પોલીસ સ્ટેશનમાં આવીને હંગામો શરૂ કર્યો હતો. પોલીસ અને વકીલ વચ્ચેની વાતચીતે ઉગ્ર સ્વરૂપ પકડ્યું હતું. આ સ્થિતિનો ફાયદો ઉઠાવીને પોલીસ કસ્ટડીમાં રહેલા યુવાનો એક પછી એક પોલીસને ચકમો આપીને ભાગી નીકળ્યા હતા.

આ ઘટના બાદ પોલીસે છેવટે બાર સામે કેસ દાખલ કર્યો હતો. આ ઉપરાંત પોલીસે સમગ્ર કાર્યવાહીમાં વિક્ષેપ ઉભો કરનારા વકીલ સામે પણ કેસ દાખલ કર્યો છે.

Published On October 27, 2012