મુંબઈની ઇમારતમાં ભીષણ આગ, ફિલ્મ ફાઇનાંસર સહિત 7ના મોત

મુંબઈ, 14 ડિસેમ્બર : મુંબઈમાં ગઈકાલે એક 26 માળની ઇમારતમાં ભીષણ આગ લાગી ગઈ કે જેમાં 7 વ્યક્તિઓના મોત થઈ ગયાં. મૃતકોમાં ફિલ્મ ફાઇનાંસર દિનેશ ગાંધી અને તેમના પત્નીનો પણ સમાવેશ થાય છે. દિનેશ ગાંધીએ તેઝાબ જેવી સુપર હિટ ફિલ્મ પ્રોડ્યુસ કરી હતી.

મળતી માહિતી મુજબ દક્ષિણ મુંબઈના પૉશ વિસ્તાર કૅમ્પ્સ કૉર્નરમાં એક 26 માળની ઇમારતમાં ગઈકાલે મોડી સાંજે આગ લાગી ગઈ અને તેમાં 7 જણા ભુંજાઈ ગયાં. આગ ઇમારતના 12મા માળે લાગી હતી. આગની માહિતી મળતા જ ફાયર બ્રિગેડના કર્મચારીઓ ઘટનાસ્થળે પહોંચી ગયાં. આગ એટલી ભયાનક હતી કે તેને બુઝાવતા 5 ફાયર કર્મચારીઓ અને 2 અધિકારીઓ પણ ગંભીર રીતે દાઝી ગયાં.

આગની ભયાનકતાનો ખ્યાલ એ વાત ઉપરથી કરી શકાય કે આગ ઉપર કાબૂ મેળવવા માટે ફાયર બ્રિગેડની 14 ગાડીઓને લગભગ 4 કલાકનો સમય લાગ્યો. પોલીસ અને ફાયર બ્રિગેડની મુસ્તેદીના પગલે આગમાંથી 26 લોકોને સલામત બહાર કાઢી શકાયાં. ઈજાગ્રસ્તોને જુદી-જુદી હૉસ્પિટલોમાં દાખલ કરાયાં છે. બીએમસીના જણાવ્યા મુજબ આગમાં માર્યા ગયેલાઓમાં ફિલ્મ ફાઇનાંસર દિનેશ ગાંધી અને તેમના પત્નીનો પણ સમાવેશ થાય છે. દિનેશ ગાંધીએ બ્લૉક બસ્ટર ફિલ્મ તેઝાબ પ્રોડ્યુસ કરી હતી.

English summary

The major fire broke out on the 12th floor of a high-rise residential building in South Mumbai has claimed lives of 7 of its residents and injured at least six firemen.