Bharat Bandh: આજે 21 ઓગસ્ટે ભારત બંધ, શું છે કારણ, શું રહેશે બંધ-શું રહેશે ખુલ્લુ? વાંચો સંપૂર્ણ વિગત

Updated: Wednesday, August 21, 2024, 7:49 [IST]

Bharat Bandh 21 August, 2024: બુધવાર, 21 ઓગસ્ટના રોજ દેશવ્યાપી હડતાળ એટલે કે "ભારત બંધ"નું આહ્વાન કરવામાં આવ્યું છે. SC/ST અનામત પર સુપ્રીમ કોર્ટના તાજેતરના નિર્ણયના વિરોધમાં ભારત બંધનું એલાન કરવામાં આવ્યું છે. વિરોધને આરક્ષણ બચાવો સંઘર્ષ સમિતિ દ્વારા બોલાવવામાં આવ્યુ છે, જે મુખ્યત્વે રાજસ્થાનના SC/ST જૂથો દ્વારા સમર્થિત છે.

કાયદા અમલીકરણ એજન્સીઓ હડતાલનો સામનો કરવાની તૈયારી કરી રહી છે. રાજસ્થાનના પોલીસ મહાનિર્દેશક યુઆર સાહુએ જિલ્લા પોલીસ અધિક્ષકોને વ્યવસ્થા જાળવવા અને સ્થાનિક સંગઠનો સાથે વાતચીત કરવાનો નિર્દેશ આપ્યો છે.

ટાઈમ્સ ઑફ ઈન્ડિયાના અહેવાલમાં સાહુએ જણાવ્યું હતું કે, "અમે અમારા અધિકારીઓને હડતાળ માટે બોલાવતા જૂથો અને માર્કેટ એસોસિએશનો સાથે બેઠકો ગોઠવવા જણાવ્યું છે."

વિવાદનું કારણ શું છે?

SC/ST ક્વોટામાં "ક્રીમી લેયર" ને અલગ કરવાના સુપ્રીમ કોર્ટના નિર્ણયથી વિવાદ થયો અને આ વિરોધ શરુ થયો. અહેવાલો અનુસાર, સમગ્ર રાજસ્થાનમાં પોલીસ દળોને શાંતિપૂર્ણ વિરોધ સુનિશ્ચિત કરવા માટે તૈનાત વધારવા અને સ્થાનિક SC/ST સંગઠનો સાથે સંકલન કરવા નિર્દેશ આપવામાં આવ્યો છે. જયપુરમાં, પોલીસ કમિશનર બિજુ જ્યોર્જ જોસેફે હડતાલને સમર્થન આપતા જૂથો સાથે વાતચીત શરૂ કરી દીધી છે. સત્તાવાળાઓ સંભવિત સંઘર્ષો અથવા વિક્ષેપોને રોકવા માટે સક્રિય પગલાં લઈ રહ્યા છે.

આરોગ્ય કર્મચારીઓ પહેલેથી જ હડતાલ પર

ભારતમાં તાજેતરમાં જ સમાન વિરોધ પ્રદર્શનો થયા બાદ આ ભારત બંધ આપવામાં આવ્યું છે, જેમાં ડૉક્ટર પર બળાત્કાર અને હત્યાના વિરોધમાં રાષ્ટ્રવ્યાપી હૉસ્પિટલ હડતાલ અને ભટિંડામાં સ્થાનિક ટ્રેડ યુનિયન ચળવળનો સમાવેશ થાય છે. ભારત બંધને વિવિધ સામાજિક અને રાજકીય સંગઠનો તરફથી સમર્થન મળવાની અપેક્ષા છે. આ વિરોધનો હેતુ અનામત પર આપવામાં આવેલા નિર્ણયનો વિરોધ કરવાનો છે.

જાહેર પરિવહન અને ખાનગી કચેરીઓ સામાન્ય રીતે આવા દિવસોમાં કામ કરતી નથી, પરંતુ એમ્બ્યુલન્સ જેવી ઇમરજન્સી સેવાઓ કાર્યરત રહેશે. પશ્ચિમ ઉત્તર પ્રદેશને ખાસ કરીને સંવેદનશીલ વિસ્તાર માનવામાં આવે છે, જેના કારણે અધિકારીઓએ પોલીસને હાઈ એલર્ટ પર મૂક્યા છે. વિરોધ દરમિયાન લોકોની સુરક્ષા માટે સત્તાવાળાઓ વ્યાપક પગલાં અમલમાં મૂકી રહ્યા છે.

ભારત બંધને ઘણા પક્ષોનુ સમર્થન

ભારત બંધને બહુજન સમાજ પાર્ટી, કોંગ્રેસ સહિત અનેક સંગઠનોએ સમર્થન આપ્યું છે. ઝારખંડ મુક્તિ મોરચા (JMM), કોંગ્રેસ અને રાષ્ટ્રીય જનતા દળ (RJD) એ ભારત બંધને સમર્થન આપ્યું છે. આ પક્ષો SC અનામત પર સુપ્રીમ કોર્ટના નિર્ણય સામે દેશવ્યાપી વિરોધમાં જોડાઈ રહ્યા છે. ભીમ આર્મીના સભ્યોએ 21 ઓગસ્ટ 2024ના રોજ સવારે 6 વાગ્યાથી સાંજના 8 વાગ્યા સુધી મનાવવામાં આવનાર ભારત બંધને સમર્થન આપવા લોકોને અપીલ કરી હતી.

શું રહેશે બંધ?

ભારત બંધની નોંધપાત્ર અસર રાજસ્થાનમાં જોવા મળી શકે છે, જ્યાં ઘણા SC/ST જૂથોએ રસ્તા પર ઉતરવાની જાહેરાત કરી છે. યુપીમાં બસપાએ પણ આ બંધને સમર્થન આપ્યું છે. ભારત બંધ દરમિયાન શાળાઓ, કોલેજો, બેંકો અને ઓફિસો બંધ રાખવા માટે હજુ સુધી કોઈ આદેશ જાહેર કરવામાં આવ્યો નથી. ભારત બંધને ધ્યાનમાં રાખીને રાજસ્થાનના પાંચ જિલ્લા જયપુર, દૌસા, ભરતપુર, ગંગાપુર સિટી અને ડીગની શાળાઓમાં રજા જાહેર કરવામાં આવી છે. આ ઉપરાંત ગુડગાંવ, ઝુંઝુનુ અને સવાઈ માધોપુર જિલ્લામાં પણ આજે શાળાઓ બંધ રહેશે. જોકે, ભારત બંધ દરમિયાન જાહેર પરિવહન સેવાઓ પ્રભાવિત થઈ શકે છે.

જાહેર પરિવહન સેવાઓ (બસ, ઓટો) ખોરવાઈ જશે. હોસ્પિટલ અને એમ્બ્યુલન્સ જેવી ઇમરજન્સી સેવાઓ ચાલુ રહેશે. બેંકો અને સરકારી કચેરીઓ હાલ માટે ખુલ્લી રહેશે. ઓનલાઈન બેંકિંગ સેવાઓ અને ATM ચાલુ રહેશે.

ભારત બંધને ધ્યાનમાં રાખીને, તમામ રાજ્યોમાં પોલીસ પ્રશાસન એલર્ટ મોડ પર છે અને કોઈપણ પરિસ્થિતિનો સામનો કરવા માટે માર્ગદર્શિકા આપવામાં આવી છે. નેશનલ કોન્ફેડરેશન ઓફ દલિત એન્ડ આદિવાસી ઓર્ગેનાઈઝેશન (NACDAOR) એ સુપ્રીમ કોર્ટના નિર્ણય સામે માંગણીઓની યાદી જારી કરી છે, જેમાં SC, ST અને OBC માટે ન્યાય અને સમાનતાની માંગણીઓનો સમાવેશ થાય છે.