ભાજપની પહેલી યાદી જાહેર, ગાંધીનગરથી અડવાણીની ટિકિટ કપાઈ

Published: Thursday, March 21, 2019, 20:57 [IST]

નવી દિલ્હીઃ ભાજપે લોકસભા ચૂંટણી માટે પહેલી યાદી જાહેર કરી દીધી છે. ગુરુવારે ભાજપે લોકસભા ચૂંટણી માટે પોતાની પહેલી યાદી જાહેર કરી છે. કેન્દ્રીય મંત્રી અને ભાજપના નેતા જેપી નડ્ડાએ જણાવ્યું કે પીએમ મોદી વારાણસીથી ચૂંટણી લડશે. અમિત શાહ ગાંધીનગરથી અને રાજનાથ સિંહ લખનઉથી ચૂંટણી લડશે. ઉલ્લેખનીય છે કે કોંગ્રેસ પહેલા જ લોકસભા ચૂંટણી માટે 6 યાદી જાહેર કરી ચૂક્યું છે. ભાજપ કેન્દ્રીય ચૂંટણી સમિતિની બેઠકમાં આ ફેસલો લેવામાં આવ્યો છે.

ભાજપે જાહેર કરી પહેલી યાદી

ભાજપે પહેલી યાદીમાં 182 લોકસભા સીટ પર ઉમેદવારોનું એલાન કર્યું છે. જેપી નડ્ડાએ જણાવ્યું કે ગૌતમબુદ્ધ નગરથી મહેશ શર્મા, બાગપતથી સત્યપાલ સિંહ, મેરઠથી રાજેન્દ્ર અગ્રવાલ ચૂંટણી લડશે. જ્યારે ગાઝિયાબાદથી વીકે સિંહને ફરીથી ટિકિટ આપવામાં આવી છે. અમેઠીથી સ્મૃતિ ઈરાનીને ફરી ટિકિટ આપવામાં આવી છે જેઓની સામે રાહુલ ગાંધી ચૂંટણી મેદાનમાં છે.

અડવાણીની સીટ પર અમિત શાહ ચૂંટણી લડશે

મથુરાથી હેમા માલિનીને ફરી ટિકિટ આપવામાં આવી છે. સાક્ષી મહારાજ ઉન્નાવથી ચૂંટણી લડશે. પહેલા તેમની ટિકિટ કપાય તેવા અહેવાલ હતા. નાગપુરથી ભાજપના પૂર્વ રાષ્ટ્રય અધ્યક્ષ નીતિન ગડકરી ચૂંટણી લડશે. જ્યારે લાલ કૃષ્ણ અડવાણીનું આ વખતે પત્તું કપાયું છે. તેમની સીટ પર પાર્ટી અધ્યક્ષ અમિત શાહ ચૂંટણી લડશે.

2014માં આવી હતી 282 સીટ

આ વખતે લોકસભા ચૂંટણી 11 એપ્રિલથી 19 મે દરમિયાન સાત તબક્કામાં થશે અને 23 મેના રોજ મતગણતરી થશે. ઉત્તર પ્રદેશ, બંગાળ અને બિહારમાં તમામ સાત તબક્કામાં વોટિંગ થશે. પહેલા તબક્કામાં 11 એપ્રિલે વોટિંગ થશે, જેના માટે નામાંકનની આખરી તારીખ 25 માર્ચ છે. ભાજપે વર્ષ 2014ની ચૂંટણીમાં 282 સીટ જીતીને ઈતિહાસ રચ્યો હતો. ભાજપે પહેલીવાર પોતાના દમ પર સરકાર બનાવી હતી.