ભાજપ હિન્દુ ધર્મને સમજતો નથી, મા દુર્ગા માટે તેને આદર નથી-TMC

પશ્ચિમ બંગાળમાં પેટાચૂંટણી પહેલા ફરી એકવાર રાજકારણ ગરમાયું છે. TMC એ દુર્ગા પૂજા સમિતિઓને 50 હજારનું અનુદાન આપવાની જાહેરાત કરી છે, જેને ભાજપે ચૂંટણી સ્ટંટ ગણાવ્યો છે અને ચૂંટણી પંચ પાસે મુખ્યમંત્રી મમતા બેનર્જી સામે પગલાં લેવાની માંગ કરી છે. જે બાદ ટીએમસીએ ભાજપ પર આકરા પ્રહારો કર્યા છે. TMC એ દાવો કર્યો છે કે ભાજપ હિન્દુત્વને સમજતી નથી અને મા દુર્ગા માટે આદર નથી.

બુધવારે ટીએમસીએ તેના સત્તાવાર ટ્વિટર એકાઉન્ટ પરથી એક ટ્વીટ કરીને ભાજપ પર પ્રહાર કર્યા હતા. ટીએમસીએ લખ્યું, હિન્દુ સંસ્કૃતિ અને મૂલ્યોના સ્વયભૂ રક્ષક હિન્દુત્વને સમજી શકતા નથી, હિન્દુ તહેવારોનું સન્માન કરવાનું ભૂલી જાય છે! હવે મા દુર્ગા અને બંગાળની પરંપરાઓ માટે તેમનો ઓછો આદર ખુલ્લો પડી ગયો છે!

પશ્ચિમ બંગાળ સરકાર દ્વારા દરેક દુર્ગા પૂજા સમિતિને 50,000 રૂપિયાનું અનુદાન આપવાની જાહેરાત પર ભાજપ દ્વારા વિરોધ દાખલ કરવામાં આવ્યો છે. પેટાચૂંટણી પહેલા આ જાહેરાત અંગે પાર્ટીએ સવાલ ઉભા કર્યા છે. સાથે જ મમતા બેનર્જીએ પોતાના નિર્ણયનો બચાવ કર્યો છે. તેમણે કહ્યું કે, આ કોઈ નવી જાહેરાત નથી, ગયા વર્ષની જેમ જ છે.
ગયા રવિવારે ટીએમસીએ જાહેરાત કરી હતી કે, મમતા બેનર્જી 30 સપ્ટેમ્બરે ભવાનીપુર વિધાનસભા બેઠક પરથી પેટા ચૂંટણી લડશે. ગત વિધાનસભાની ચૂંટણી દરમિયાન નંદીગ્રામ બેઠક પરથી ભાજપના સુવેન્દુ અધિકારી સામે હાર્યા બાદ મુખ્યમંત્રી તરીકે ચાલુ રહેવા માટે તેમણે પેટા ચૂંટણી જીતવી પડશે. બંગાળ ભાજપના ઉપાધ્યક્ષ પ્રતાપ બેનર્જી અને બાલુરઘાટના સાંસદ સુકાંત મજુમદાર સહિત ભાજપનું પ્રતિનિધિમંડળ મંગળવારે રાજ્યના ચૂંટણી પંચના અધિકારીઓને મળ્યું અને બેનર્જી સામે પગલાં લેવાની માંગ કરી હતી.
ભાજપના પ્રતિનિધિ મંડળે કહ્યું કે, અમે ચૂંટણી પંચને વિનંતી કરીએ છીએ કે ભવાનીપુર પેટાચૂંટણી માટે ટીએમસી ઉમેદવાર મમતા બેનર્જી સામે કાર્યવાહી કરે. તેમને પેટાચૂંટણીમાં ભાગ લેતા રોકવા જોઈએ.

English summary

BJP does not understand Hinduism, it has no respect for Maa Durga-TMC