CBSE ધોરણ 10 અને 12ની પરીક્ષા આજે 15 ફેબ્રુઆરીથી શરુ, 38 લાખ પરીક્ષાર્થી, 191 વિષયો, જાણો આખો કાર્યક્રમ

સીબીએસઈની ધોરણ 10 અને 12ની બોર્ડની પરીક્ષા આજથી શરુ થઈ રહી છે. આ પરીક્ષા 5 એપ્રિલે પૂર્ણ થશે. અહીં જાણો સંપૂર્ણ વિગત.

Published: Wednesday, February 15, 2023, 8:10 [IST]

CBSE Exam: કેન્દ્રીય માધ્યમિક શિક્ષણ બોર્ડ(સીબીએસઈ)ની ધોરણ 10 અને 12 સાયન્સ, કૉમર્સ અને આર્ટસની પરીક્ષાઓ આજે સવારે 10.30 વાગ્યાથી દેશભરમાં શરુ થઈ રહી છે. બધી પરીક્ષાઓ 5 એપ્રિલ સુધી પૂરી થશે. દેશના 7250થી વધુ પરીક્ષા કેન્દ્રો પર 39 લાખ છાત્રો પરીક્ષા આપશે. દેશની બહાર પણ આ પરીક્ષાનુ આયોજન કરવામાં આવી રહ્યુ છે. સીબીએસઈ બોર્ડ પરીક્ષાનુ આયોજન દેશની બહાર 26 દેશોમાં કરવામાં આવી રહ્યુ છે.

CBSEની ડેટશીટ ડિસેમ્બર 2022માં જ બહાર પાડવામાં આવી હતી. CBSE એડમિટ કાર્ડ ડાઉનલોડ કરવાની પ્રક્રિયા પણ સમજાવવામાં આવી છે. પરીક્ષાના એક દિવસ પહેલા 14 ફેબ્રુઆરીએ, CBSE એ એક પ્રેસ નોટ જાહેર કરીને જણાવ્યુ હતુ કે ધોરણ 10 માટે નોંધાયેલા ઉમેદવારોની કુલ સંખ્યા 21.8 લાખ છે. CBSE બોર્ડ પરીક્ષા 2023 પરના ઈન્ડિયન એક્સપ્રેસના અહેવાલમાં જણાવવામાં આવ્યુ છે કે આ વર્ષે કુલ 38 લાખ વિદ્યાર્થીઓ ધોરણ 10 અને 12ની પરીક્ષા આપશે.

ધોરણ 10ના કુલ 21.8 લાખ વિદ્યાર્થીઓમાંથી 9.39 લાખ છોકરીઓ છે, જ્યારે 12.4 લાખ છોકરાઓ છે. 10 વિદ્યાર્થીઓએ 'અન્ય' કેટેગરી માટે પણ પસંદગી કરી છે. ધોરણ 12 માટે નોંધાયેલા ઉમેદવારોની કુલ સંખ્યા 10ની સરખામણીમાં ઓછી છે કારણ કે આ વર્ષની બોર્ડ પરીક્ષા માટે 16.9 લાખ ઉમેદવારોએ નોંધણી કરાવી છે. આ 16 લાખ વિદ્યાર્થીઓમાંથી 7.4 લાખ છોકરીઓ અને 9.51 છોકરાઓ છે. 5 બાળકોએ 'અન્ય' શ્રેણી હેઠળ નોંધણી કરાવી છે.

ધોરણ 10ની પરીક્ષા 16 દિવસમાં 76 વિષયો માટે લેવામાં આવશે અને 21 માર્ચ સુધીમાં સમાપ્ત થશે. ધોરણ 12 માટે 115 વિષયોની પરીક્ષા 36 દિવસમાં લેવામાં આવશે. જો આપણે 5 એપ્રિલના રોજ સમાપ્ત થતી બંને પરીક્ષાઓ પર નજર કરીએ તો CBSE કુલ મળીને 191 વિષયો માટે પરીક્ષાઓ યોજશે. CBSEએ પરીક્ષા પહેલા વિદ્યાર્થીઓને ઈલેક્ટ્રોનિક ઉપકરણોના ઉપયોગ સામે ચેતવણી આપી છે. આમાં આર્ટિફિશિયલ ઇન્ટેલિજન્સ આધારિત ChatGPT માટે ટૂલ્સનો ઉપયોગ ન કરવાનો સમાવેશ થાય છે. સીબીઆઈએ કહ્યુ કે, પરીક્ષા નિયંત્રક પરીક્ષામાં ગેરરીતિ માટે અયોગ્ય માધ્યમોનો ઉપયોગ ન કરવા માટે તમામ પ્રયાસ કરી રહ્યા છે.

તમને જણાવી દઈએ કે ધોરણ 10ના મુખ્ય વિષયોની પરીક્ષા 27 ફેબ્રુઆરીથી શરૂ થશે. ધોરણ 10ની પ્રથમ મુખ્ય પરીક્ષા અંગ્રેજી વિષયની હશે. જ્યારે ધોરણ 12ની મુખ્ય પરીક્ષા 24 ફેબ્રુઆરીથી શરૂ થશે. તે દિવસે 12મા ધોરણ માટે અંગ્રેજીની પરીક્ષા લેવામાં આવશે. દરરોજ પરીક્ષા માત્ર એક જ શિફ્ટમાં લેવામાં આવશે. પરીક્ષાનો સમય સવારે 10:30 થી બપોરે 1:30 સુધીનો નક્કી કરવામાં આવ્યો છે.