ગુજરાતમાં મતદાન હિમાચલ પ્રદેશની ચૂંટણીના પરિણામો પહેલા થશે: EC
ચૂંટણી પંચે કહ્યું કે ગુજરાત મતદાન હિમાચલ પ્રદેશની ચૂંટણીના પરિણામો જાહેર થાય તે પહેલા થઇ જાશે. જાણો આ અંગે વધુ અહીં.
ચૂંટણી પંચના કમિશ્નર અચલ કુમાર જ્યોતિએ ગુજરાત વિધાનસભાની ચૂંટણી મામલે સ્પષ્ટતા આપતા કહ્યું કે ગુજરાતના શેડ્યુલની યોજના એવી રીતે કરશે કે જેથી ગુજરાત મતદાન હિમાચલ પ્રદેશની ચૂંટણીના પરિણામો જાહેર થાય તે પહેલા થઇ જાય. જેથી કરીને હિમાચલ પ્રદેશની ચૂંટણીના પરિણામો ગુજરાતના ચૂંટણીના પરિણામો પર કોઇ અસર ના કરે. સાથે જ તેમણે કહ્યું કે ગુજરાતાં પૂર બાદ પુનર્વસનનું કાર્ય પૂર્ણ થઇ ગયું છે. જેથી કરીને જે સ્ટાફ પુનવર્સનમાં વ્યસ્ત હતો તે હવે ચૂંટણી લક્ષી કાર્યોમાં મદદરૂપ થશે. કુલ 26443 રાજ્ય સરકારના કર્મચારીઓને ચૂંટણીની જવાબદારીઓ સોંપવામાં આવશે. દિલ્હી ખાતે ચૂંટણી પંચના કમિશ્નર અચલ કુમાર જ્યોતિએ આ તમામ જાણકારી આપવાની સાથે જ જણાવ્યું કે હિમાચલ પ્રદેશના 3 જિલ્લામાં હિમવર્ષો શરૂ થાય તે પહેલા મતદાન કરવાની પણ માંગ ઉઠી છે.
ઉલ્લેખનીય છે કે એએનઆઇને આપેલા એક એક્સક્યૂઝિવ ઇન્ટરવ્યૂમાં ચૂંટણી પંચના કમિશ્નર અચલ કુમાર જ્યોતિએ આ વાત ઉચ્ચારી હતી. નોંધનીય છે કે હિમાચલ પ્રદેશમાં 9મી નવેમ્બરના રોજ મતદાન પ્રક્રિયા શરૂ કરવામાં આવશે. અને 18 ડિસેમ્બરના રોજ તેના પરિણામોની મતગણતરી શરૂ કરવામાં આવશે. ત્યારે જો ચૂંટણી પંચના કમિશ્નરના ઉપરોક્ત નિવેદનને જોઇએ તો 18મી તારીખ પહેલા એટલે કે ડિસેમ્બરના પહેલા કે બીજા અઠવાડિયામાં ગુજરાતમાં પણ વિધાનસભાની ચૂંટણીનું મતદાન શરૂ થઇ જશે. ઉલ્લેખનીય છેે કે આજે જ ગુજરાત વિધાનસભાની ચૂંટણીની તારીખો જાહેર થાય તેવી જાણકારી મળી છે. પણ અધિકૃત જાહેરાતની હજી રાહ જોવાય છે.