Delhi Election Result 2025 : દિલ્હી ચૂંટણીના પરિણામો પહેલા જ કેજરીવાલ એક્શનમાં, ઉમેદવારોની બેઠક બોલાવી

Delhi Assembly Election Results 2025 : દિલ્હી વિધાનસભા ચૂંટણીના પરિણામો આવે તે પહેલા જ અરવિંદ કેજરીવાલ એક્શનમાં આવ્યા છે.

પરિણામના એક દિવસ પહેલાં આમ આદમી પાર્ટીએ તમામ 70 ઉમેદવારોની એક બેઠક બોલાવી છે. આ બેઠકમાં પાર્ટીના સંયોજક અરવિંદ કેજરીવાલ તેની અધ્યક્ષતા કરી રહ્યાં છે.

ન્યૂઝ એજન્સી ANI અનુસાર, આ બેઠકમાં ચૂંટણી પરિણામોની તૈયારી અને ધારાસભ્યોની સંભાવિત ખરીદી-વેચાણ સંબંધિત આરોપો પર ચર્ચા કરાઈ. આમ આદમી પાર્ટીના રાષ્ટ્રીય સંયોજક અરવિંદ કેજરીવાલે ભાજપ (BJP) પર ગંભીર આરોપ લગાવ્યા છે. તેમણે દાવો કર્યો કે ભાજપ આમ આદમી પાર્ટીના ઉમેદવારોને પોતાની તરફ ખેંચવાનો પ્રયાસ કરી રહી છે.

દિલ્હીની મુખ્યમંત્રી આતિશીએ પણ આ આરોપોને પુષ્ટિ આપી છે. ભાજપે આવા દાવાઓને સંપૂર્ણપણે ખોટા ગણાવ્યા છે. કેજરીવાલે કહ્યું કે કેટલીક એજન્સીઓ ભાજપને 55થી વધુ સીટો મળવાનો અંદાજ લગાવી રહી છે. તેમનું કહેવું છે કે દિલ્હીમાં પરિણામો પહેલા ઓપરેશન લોટસ શરુ થઈ ગયું છે.

કેજરીવાલે દાવો કર્યો છે કે છેલ્લા બે કલાકમાં 16 AAP ઉમેદવારોને મંત્રીપદ અને 15-15 કરોડ રૂપિયાની ઓફર સાથે ભાજપમાં જોડાવા માટે ફોન આવવા લાગ્યા છે. કેજરીવાલે X પર લખ્યું કે જો ભાજપને 55થી વધુ સીટો મળી રહી છે તો BJP અમારી પાર્ટીના ઉમેદવારોને ફોન શા માટે કરી રહી છે?

કેજરીવાલનો આરોપ છે કે એગ્ઝિટ પોલના સર્વે ફેક છે અને તેનો ઉપયોગ કરીને ભાજપ ઉમેવાદારોને પોતાના પક્ષમાં ખેંચવાનો પ્રયાસ કરી રહી છે.

આમ આદમી પાર્ટીના પ્રવક્તા પ્રિયંકા કક્કડે જણાવ્યું કે, ભાજપને લાગે છે કે ફેક સર્વે દ્વારા તે અમારા નેતાઓ અને મંત્રીઓ સાથે સોદાબાજી કરી શકશે. હું ભાજપને કહેવા માંગું છું કે તમે અમારા કાર્યકરોને પણ તોડી નહીં શકો,, નેતાઓ અને મંત્રીઓ તો દૂરની વાત છે.

તેણીએ જણાવ્યુ કે, 2013, 2015 અને 2020માં અમે એગ્ઝિટ પોલમાં નહોતા દેખાતા અને દરેક વખતે બહુમતિ મળી. આ વખતે પણ એવું જ થશે. જ્યારે અમે એગ્ઝિટ પોલમાં ન હોઈએ ત્યારે અમે ભવ્ય જીત મેળવીએ છીએ. આ વખતે પણ કંઈ અલગ નહીં હોય.

જણાવી દઈએ કે, દિલ્હીમાં મતગણતરી 8 ફેબ્રુઆરીએ યોજાશે. ચૂંટણી પંચ અને પ્રશાસન સુરક્ષાને લઈને સંપૂર્ણ સજ્જ છે. ઈવીએમને સ્ટ્રોંગ રૂમમાં સુરક્ષિત રાખવામાં આવ્યા છે અને સમગ્ર દિલ્હીમાં 19 સ્થળોએ કુલ 70 સ્ટ્રોંગ રૂમ બનાવવામાં આવ્યા છે.

English summary

Kejriwal Holds Emergency Meeting with 70 Candidates Amid Allegations of BJP's Horse-Trading