ગુજરાતનો વિકાસ કેન્દ્રના નાણાંથી થયો છે : કપિલ સિબલ
આજે ટેલિકોમ પ્રધાન કપિલ સિબલે એક પણ વાર નરેન્દ્ર મોદીનું નામ લીધા વિના જણાવ્યું કે એક વ્યક્તિ તેના રાજ્યમાં ત્રણ વાર ચૂંટણી જીતી ગઇ છે અને હવે તે પોતાને વડાપ્રધાન પદ માટેની દાવેદાર માની રહી છે. પોતાને વડાપ્રધાન પદની દાવેદાર માનનારી વ્યક્તિએ ત્યાં કશું જ મહત્વનું કાર્ય કર્યું નથી. જે કાર્ય થયું છે એ કેન્દ્ર સરકારે આપેલા ભંડોળમાંથી થયું છે.
બલ્લિમારન વિધાનસભા મતવિસ્તારમાં એક રોડ પ્રોજેક્ટનું ઉદઘાટન કરતા સમયે સિબલ આમ જણાવી રહ્યા હતા. તેમણે ગુજરાતના મુખ્યમંત્રી નરેન્દ્ર મોદીની તુલના દિલ્હીના મુખ્યમંત્રી શીલા દીક્ષિત સાથે કરીને જણાવ્યું કે દિલ્હીના મુખ્યમંત્રી સતત ચાર વાર મુખ્યમંત્રી બન્યા છે. આ બધું લોકો સાથે તેમના સંબંધને કારણે છે.
આ પ્રસંગે હાજર શીલા દીક્ષિતે પણ જણાવ્યું કે અહીંની સરકાર ત્રણ વાર જીતી છે કારણ કે તેણે લોકોને આપેલા વચનો પૂરા કર્યાં છે. અહીં તમે વિશ્વનું બીજા નંબરનું મોટું એરપોર્ટ જોઇ શકો છો. અહીં મેટ્રો પણ કાર્યાન્વિત થઇ ગઇ છે. તેને જોવા વિદેશીઓ પણ આવે છે કે રોજ આ મેટ્રો 20થી 22 લાખ મુસાફરોને લઇને કેવી રીતે કામ કરે છે. અમે દિલ્હીમાં 8થી 9 કલાકને બદલે 24 કલાક વીજળી આપી છે.