ગુડીયા રેપ કેસ: બીજા આરોપીની પણ બિહારથી ધરપકડ

નવી દિલ્હી, 22 એપ્રિલ: હાલમાં દેશમાં ચર્ચા અને વિરોધનો મુદ્દો બનેલો દિલ્હીનો ગુડીયા રેપ કેસમાં બીજા આરોપીની પણ પોલીસે ધરપકડ કરી લીધી છે. સૂત્રોના જણાવ્યા અનુસાર બીજા આરોપી જેનું નામ પ્રદીપ છે તેને બિહારથી રવિવારે મોડી રાત્રે પકડી પાડવામાં આવ્યો, પોલીસ તેને આજે સવારે દિલ્હી લઇને આવશે. નોંધનીય છે કે મુખ્ય આરોપી મનોજે જણાવ્યું હતું કે ગુડીયા સાથે દુષ્કર્મ કરવામાં તે એકલો ન્હોતો, તેને આ કૃત્યમાં તેના મિત્ર પ્રદિપે પણ સાથ આપ્યો હતો.

અત્રે ઉલ્લેખનીય છે કે દિલ્હીના ગાંધીનગરમાં મનોજ અને પ્રદીપ સાથે રહે છે. પ્રદીપ થોડા દિવસો પહેલા દિલ્હી નોકરી માટે આવ્યો હતો. કહેવામાં આવે છે કે આ ઘટનાના દિવસે મનોજ અને પ્રદીપે જોરદાર દારૂ ઢીચ્યો હતો અને ટીવી પર બ્લૂ ફિલ્મ પણ જોઇ હતી.

ત્યારબાદ બંનેએ પાંચ વર્ષની ગુડીયાનું અપહરણ કર્યું, તેને બાંધી રાખી તેની સાથે ચાર દિવસ સુધી બળાત્કાર કરતા રહ્યા. એટલું જ નહી બંનેની હેવાનીયતે એટલી હદ વટાવી દીધી કે બંને નરાધમોએ ગુડીયાના ગુપ્તાંગમાં મીઠું, શીશી, અને મીણબત્તી સુધ્ધા નાખી દીધી હતી જેનો ખુલાસો એઇમ્સમાં ગુડિયાની સર્જરી દરમિયાન થયો.

આરોપી મનોજને 14 દિવસની ન્યાયિક હિરાસતમાં મોકલી દેવામાં આવ્યો છે અને પ્રદીપની સાથે શું થશે એ આજે થોડીવારમાં ખબર પડી જશે. ઉલ્લેખનીય છેકે ગુડીયાને ન્યાય અપાવવા માટે હાલમાં દિલ્હી સહિત આખો દેશ આગળ આવ્યો છે. પીએમ મનમોહનસિંહ અને યૂપીએ અધ્યક્ષ સોનિયા ગાંધી પાસે મહિલાઓએ આરોપીઓને ફાંસી આપવાની માંગ કરી છે. આજે ત્રીજા દિવસે પણ લોકો દિલ્હીના રસ્તાઓ પર પ્રદર્શન કરી રહ્યા છે અને બળાત્કારીઓ માટે ફાંસી માગી રહ્યા છે.

English summary

The second accused Pradeep in the brutal rape case of a five-year-old girl in New Delhi has been arrested from Lakhisarai in Bihar.