Hemant Soren : હેમંત સોરેન ફરીથી ઝારખંડના મુખ્યમંત્રી બન્યા
Hemant Soren : કેન્દ્રની નરેન્દ્ર મોદી સરકાર અને બીજેપીની જોડતોડની રાજનીતિને કાંટાની ટક્કર આપનારા હેમંત સોરેન ફરીથી ઝારખંડના મુખ્યમંત્રી બન્યા છે.
ઝારખંડના સીએમ ચંપાઈ સોરેનના રાજીનામા બાદ હવે હેમંત સોરેને મુખ્યમંત્રી તરીકે શપથ લીધા. રાંચીના રાજભવનમાં હેમંત સોરેનના શપથ સમારોહ દરમિયાન JMM સહિત સહયોગી પક્ષોના નેતાઓ હાજર રહ્યા.
એન્ફોર્સમેન્ટ ડિરેક્ટોરેટે હેમંત સોરેનની 31 જાન્યુઆરીના રોજ જમીન પર કબજો કરવાના આરોપમાં ધરપકડ કરી હતી. ધરપકડ પહેલા સોરેને ઝારખંડના મુખ્યમંત્રી પદેથી રાજીનામું આપી દીધું હતું.
ઝારખંડ હાઈકોર્ટે તેમને 28 જૂને જામીન આપ્યા છે. જામીનનો આદેશ આપતી વખતે કોર્ટે કહ્યું કે પ્રથમ દૃષ્ટિએ સોરેન આ કેસમાં દોષિત જણાતા નથી.
ઝારખંડ મુક્તિ મોરચાના કાર્યકારી પ્રમુખ હેમંત સોરેન તેમની પાર્ટીના નેતૃત્વ હેઠળના ગઠબંધનના ધારાસભ્યો વચ્ચે સર્વસંમતિ પછી ત્રીજી વખત રાજ્યના મુખ્યમંત્રી બન્યા છે.
હેમંત સોરેનને જામીન મળ્યા બાદ ઝારખંડના કાર્યવાહક મુખ્યમંત્રી ચંપાઈ સોરેને બુધવારે પોતાના પદ પરથી રાજીનામું આપી દીધું હતું. આ પછી રાજ્યપાલે હેમંત સોરેનને નવી સરકાર બનાવવાનું આમંત્રણ આપ્યું. રાજ્યપાલ તરફથી આમંત્રણ મળ્યા બાદ હેમંત સોરેને આજે સાંજે મુખ્યમંત્રી પદના શપથ લીધા.
જણાવી દઈએ કે, સીએમ હેમંત સોરેન વિરુદ્ધ પાંચ મહિના પહેલા કથિત જમીન કૌભાંડ કેસમાં કાર્યવાહી કરવામાં આવી હતી. તેમણે ધરપકડ પહેલા જ પોતાના પદ પરથી રાજીનામું આપી દીધું હતું. જે બાદ ચંપાઈ સોરેનને રાજ્યના મુખ્યમંત્રી બનાવવામાં આવ્યા હતા.
ચંપાઈ સોરેને બુધવારે જ રાજ્યપાલ સીપી રાધાકૃષ્ણનને પોતાનું રાજીનામું સોંપ્યું હતું. આ સાથે રાજ્યમાં નવી સરકારની રચનાનો માર્ગ મોકળો થયો હતો.
Click it and Unblock the Notifications
Sign in with Google
