હિમાચલ પ્રદેશમાં વાદળ ફાટવાથી 49 લોકો હજુ પણ ગુમ, બચાવ અને રાહત કાર્ય યથાવત

Himachal Pradesh Cloudburst: હિમાચલ પ્રદેશના રામપુર બુશહર સહિત અનેક વિસ્તારોમાં એક પછી એક વાદળ ફાટવાની ઘટનાઓ સામે આવી છે. રાજ્યના મંત્રી રાજેશ ધર્માણીએ જણાવ્યું કે ચાર લોકોના મોત થયા છે અને 49 લોકો લાપતા છે. ધર્માણીએ કહ્યું કે મુખ્યમંત્રીએ સચિવાલયમાં ઉચ્ચ સ્તરીય બેઠક યોજી હતી.

તેમણે અસરગ્રસ્ત વિસ્તારની મુલાકાત લેવાનો પ્રયાસ કર્યો, પરંતુ ખરાબ હવામાનને કારણે તે જઈ શક્યા નહીં. કુલ્લુ, શિમલા અને મંડી જિલ્લાઓ ગંભીર રીતે પ્રભાવિત છે. સમગ્ર વિસ્તારમાં એલર્ટ જાહેર કરવામાં આવ્યું છે."

હિમાચલ પ્રદેશના મુખ્યમંત્રી સુખવિંદર સિંહ સુખુએ કહ્યું કે રાજ્ય મંત્રી જગત સિંહ નેગી ઘટનાસ્થળે છે. એનડીઆરએફ અને સેનાની ટીમો સક્રિય રીતે બચાવ કાર્યમાં લાગેલી છે.

CMએ જણાવ્યું હતું કે "બચાવ અને રાહત પ્રયાસો પૂરજોશમાં ચાલી રહ્યા છે. હું એવા વિસ્તારોની મુલાકાત લેવાનું આયોજન કરી રહ્યો છું જ્યાં મોટાભાગના લોકો ગુમ છે. જો હવામાન ચોખ્ખું રહેશે, તો અમે બચાવ કામગીરીને ઝડપી બનાવી શકીશું. અમારો હાલનો હેતુ છે કાટમાળ નીચે ફસાયેલા લોકોને બચાવો અને મૃતદેહોને બહાર કાઢવા. હું પ્રવાસીઓને ધોધ અને નદીઓથી દૂર રહેવા વિનંતી કરું છું.

એનડીઆરએફના આસિસ્ટન્ટ કમાન્ડન્ટ કરમ સિંહે બચાવ કામગીરી અંગે વિસ્તૃત માહિતી આપી હતી. તેમણે કહ્યું, "ક્લાઉડબર્સ્ટ સાઇટની નજીક લગભગ 20-25 મકાનો, એક પાવર પ્લાન્ટ અને એક દવાખાનું હતું. એવો અંદાજ છે કે 40 થી વધુ લોકો વહી ગયા છે. ચાર યુનિટમાં વહેંચાયેલી NDRFની બે ટીમો અહીં તૈનાત છે. અમે ભારતીય સેના, CISF, IRBP, સિવિલ પોલીસ, SDRF અને સ્વયંસેવકો સાથે સંકલન કરી રહ્યા છીએ."

પરિસ્થિતિનું વર્ણન કરતા, પુનઃસ્થાપન કાર્યમાં રોકાયેલા JCB ડ્રાઇવર અજય કુમારે કહ્યું, "અહીં ભૂસ્ખલનને કારણે ભારે નુકસાન થયું છે. ગઈકાલે વાદળ ફાટવાને કારણે રસ્તાઓ બંધ થઈ ગયા હતા. અમે તેને સુધારવા માટે કામ કરી રહ્યા છીએ." નરેશ કુમાર નામના પ્રત્યક્ષદર્શીએ પોતાનું દુઃખ વહેંચતા કહ્યું, "અમારા કેટલાક સંબંધીઓ ગઈકાલે રાત્રે મૃત્યુ પામ્યા હતા. લગભગ 38-40 લોકો હજુ પણ ગુમ છે. હું સરકારને આ આપત્તિથી પ્રભાવિત લોકોને મદદ કરવા અપીલ કરું છું."

હિમાચલ પ્રદેશ પોલીસે જણાવ્યું કે ડીજીપીએ સંચાર અને સર્વેલન્સ સાધનોની ખરીદીની સમીક્ષા કરી અને અસરકારક આપત્તિ શમન માટે રાજ્ય આપત્તિ નિયંત્રણ કેન્દ્રની સ્થાપના કરી. મુખ્ય નિર્દેશોમાં સેટેલાઇટ ફોન, ડ્રોન અને ઓપરેશનલ માર્ગદર્શિકાનો સમાવેશ થાય છે.

તેમના પ્રયાસો વિશે વધુ વિગતો આપતા કરમ સિંહે કહ્યું: "સર્ચ ઓપરેશન ચાલુ છે. અહીંથી મૃતદેહો મળી આવ્યા છે. અમારી પાસે બચાવ પ્રયાસોમાં મદદ કરવા માટે સાધનો અને ટેક્નોલોજી છે. તમામ હિતધારકો કાર્યક્ષમતાથી કામ કરી રહ્યા છે."

મુખ્યમંત્રીએ ભારપૂર્વક જણાવ્યું હતું કે જ્યાં સુધી તમામ ગુમ વ્યક્તિઓ મળી ન આવે ત્યાં સુધી બચાવ કામગીરી ચાલુ રહેશે. સત્તાવાળાઓ અસરગ્રસ્ત વિસ્તારોમાં વહેલી તકે સામાન્ય સ્થિતિ પુનઃસ્થાપિત કરવા માટે પ્રતિબદ્ધ છે.

English summary

Himachal Pradesh: 49 people still missing due to cloudburst, rescue and relief work continues