'કેન્દ્ર સરકારે ગાંધીના દેશને બનાવ્યો 'બનાના રિપબ્લિક' દેશ'
જોકે આ અંગે જમ્મુ-કાશ્મીરના સીએમ ઉમર અબ્દુલ્લા પહેલા જ કેન્દ્ર સરકાર પ્રત્યે પોતાની નારાજગી વ્યક્ત કરી ચૂક્યા છે, હવે જમ્મુ-કાશ્મીરના મુખ્ય વિપક્ષી પાર્ટી પીપલ્સ ડેમોક્રેટિક પાર્ટીના સંરક્ષક અને પૂર્વ કેન્દ્રીય ગૃહમંત્રી મુફ્તી મોહંમ્મદ સઇદે સરકાર પ્રત્યે પોતાનો ગુસ્સો જાહેર કર્યો છે. મુફ્તીએ ભારતને 'બનાના રિપબ્લિક' ગણાવ્યું છે. બનાના રિપબ્લિકનો અર્થ એવો થાય છે કે તે દેશ વ્યવસ્થિત ના હોય. પીડીપીના નેતા મુફ્તી મોહંમ્મદે જણાવ્યું કે કેન્દ્રની સરકારે અફઝલને ફાંસી પોતાના રાજકિય હિત માટે આપી છે.
મુફ્તીએ જણાવ્યું કે કેન્દ્ર સરકારના રાજનીતિથી પ્રેરિત થઇને સંસદ હુમલાના આરોપી અફઝલને ફાંસી આપી દીધી છે. પીડીપી સંરક્ષક મુફ્તીએ જણાવ્યું કે કોંગ્રેસ સરકારે અફઝલને ફાંસી આપતા પહેલા તેના પરિવારને જાણ પણ નથી કરી અને તેના પરિવારને તેની સાથે છેલ્લી મુલાકાત પણ કરવા નથી દીધી.
તેમણે જણાવ્યું કે અફઝલના પરિવારને તેનો મૃતદેહ પણ સોપાયો નહી અને તેને જેલમાં જ દફનાવી દેવાયો. કેન્દ્ર સરકારના આ વિચારે ગાંધીના આ દેશના હોદ્દાને ઘટાડી તેને બનાના રિપબ્લિક બનાવી દીધો છે.