જો તમે આ સરકારને પાછી લાવ્યા તો એ લોકતંત્રને ખતમ કરી દેશેઃ મલ્લિકાર્જૂન ખડગે

Updated: Monday, April 22, 2024, 7:54 [IST]

Lok Sabha Election 2024: મધ્ય પ્રદેશના સતનામાં યોજાયેલી બેઠકમાં કોંગ્રેસના રાષ્ટ્રીય અધ્યક્ષ મલ્લિકાર્જુન ખડગે અને મધ્ય પ્રદેશ કોંગ્રેસના અધ્યક્ષ જીતુ પટવારીએ કોંગ્રેસના સતના ઉમેદવાર સિદ્ધાર્થ કુશવાહાના સમર્થનમાં સભાને સંબોધી હતી. આ કાર્યક્રમમાં પૂર્વ કેન્દ્રીય મંત્રી અરુણ યાદવ, રાજ્યસભાના સાંસદ વિવેક ટંઢા, પૂર્વ મંત્રી કમલેશ્વર પટેલ, સી.પી. મિત્તલ, જિલ્લા અધ્યક્ષ શ્રી દિલીપ મિશ્રા અને અન્ય કોંગ્રેસ અને ઈન્ડિયા ગઠબંધનના નેતાઓ હાજર રહ્યા હતા.

કોંગ્રેસના રાષ્ટ્રીય અધ્યક્ષ મલ્લિકાર્જુન ખડગેએ કહ્યું કે હું તમને ખાતરી આપું છું કે 102 બેઠકો પર થયેલા મતદાનમાં ઈન્ડિયા ગઠબંધનને પ્રચંડ બહુમતી મળશે. આજે લોકોના મુખ્ય મુદ્દા મોંઘવારી અને બેરોજગારી છે જેના કારણે દરેક વ્યક્તિ પીડાઈ રહી છે, માત્ર એક જ વ્યક્તિ તેનાથી પીડાઈ રહી નથી અને તે છે મોદીજી.

ખડગેએ વધુમાં ઉમેર્યુ કે, કોંગ્રેસે જનતા માટે કામ કર્યુ, દેશના પ્રથમ વડાપ્રધાન પંડિત જવાહરલાલ નેહરુની યોજનાઓમાં તમને દરેક ક્ષેત્રનો વિકાસ જોવા મળશે. જે દેશમાં એક સોય પણ ન હતી ત્યાં તેઓએ વિજ્ઞાન અને ટેક્નોલૉજીનો પ્રચાર કર્યો અને રૉકેટ પણ બનાવ્યા, જ્યારે ભાજપ માત્ર કોંગ્રેસને ગાળો આપીને બંધારણનો નાશ કરી રહી છે. બીજેપી સાંસદ કહે છે કે અમે બંધારણ બદલવા માંગીએ છીએ, તેથી અમને 400 સીટોની જરૂર છે.

ખડગેએ કહ્યું કે વડા પ્રધાન ઘણું ખોટું બોલે છે, તેમણે વિદેશમાંથી કાળું નાણું લાવવાનું વચન આપ્યું હતું, દરેકના ખાતામાં 15 લાખ રૂપિયા આવશે, દર વર્ષે 2 કરોડ નોકરીઓ આપશે, ખેડૂતોની આવક બમણી કરશે, પરંતુ કોઈને કંઈ મળ્યું નથી. પરંતુ અમે જે વચનો આપીએ છીએ તે પૂરા કરીએ છીએ. કોંગ્રેસે મનરેગા, ફૂડ સિક્યોરિટી એક્ટ જેવા કાયદા બનાવ્યા અને ગરીબોના હિતોનું રક્ષણ કર્યું. જ્યારે નરેન્દ્ર મોદી કહે છે કે હું ગરીબોને મફત રાશન આપું છું પરંતુ તેઓ ભૂલી જાય છે કે આ કોંગ્રેસનો બનાવેલો કાયદો છે, જેના હેઠળ આપણે ગરીબોને રાશન આપી રહ્યા છીએ.

ખડગેએ કહ્યું કે અમારી સરકારે ખેડૂતોની 72 હજાર કરોડ રૂપિયાની લોન માફ કરી હતી, તેમણે માત્ર અમીરોને બેંક લોન અપાવી અને તેમને ભગાડ઼્યા. એક તરફ તેઓ 400ની વાત કરે છે, તો બીજી તરફ જે લોકો ભ્રષ્ટાચારી કહેવાતા હતા તેઓને હવે તેમની સાથે બેસાડવામાં આવી રહ્યા છે, આનું કારણ એ છે કે ગૃહમંત્રી પાસે બહુ મોટું 'વોશિંગ મશીન' છે, જેમાં કપડાંને બદલે, લોકોને નાખીને સાફ કરવામાં આવે છે.

ખડગેએ કહ્યું કે જો તમે આ સરકારને પાછી લાવશો તો તે લોકતંત્ર અને બાબા સાહેબે બનાવેલા બંધારણને નષ્ટ કરી દેશે. જો તમે તમારા મતના અધિકારનું રક્ષણ કરવા માંગતા હોવ તો કોંગ્રેસ પાર્ટીને મત આપો અને સિદ્ધાર્થ કુશવાહાજીને વિજયી બનાવો. મધ્ય પ્રદેશ કોંગ્રેસના અધ્યક્ષ જીતુ પટવારીએ તેમના સંબોધનમાં કહ્યું કે રાહુલજીની તબિયત સારી ન હોવાને કારણે તેમણે શ્રી ખડગેજીને સતનામાં આ સભાને સંબોધિત કરવા વિનંતી કરી. હું બંને નેતાઓનો હૃદયપૂર્વક આભાર માનું છું, શ્રી પટવારીએ તેમને તાળીઓના ગડગડાટથી આવકારવા વિનંતી કરી.

આ ઉપરાંત, વડાપ્રધાન નરેન્દ્ર મોદીએ જે રીતે કોંગ્રેસ પર આકરા પ્રહારો કર્યા અને કહ્યું કે તેમની પાસે લોકસભા ચૂંટણીમાં મેદાનમાં ઉતરવા માટે 300 ઉમેદવારો નથી, કોંગ્રેસ અધ્યક્ષ મલ્લિકાર્જુન ખડગેએ તેના પર જોરદાર પલટવાર કર્યો છે. રાંચીમાં જ્યારે પત્રકારોએ ખડગેને આ વિશે પૂછ્યું તો તેમણે કહ્યું કે મેં પીએમના દરેક સવાલના જવાબ આપવાનો કોન્ટ્રાક્ટ લીધો નથી. જો કે, ખડગેએ સ્પષ્ટ કહ્યું કે અમે ભાજપને રોકવા માટે અને સત્તામાં આવવા માટે જરૂરી સીટોની સંખ્યા જીતવાના છીએ. અમારી પાસે ભાજપને રોકવા માટે જરૂરી સંખ્યા છે.

ખડગેએ રેલીનું આયોજન કરવા બદલ ઝારખંડના ભૂતપૂર્વ મુખ્ય પ્રધાન હેમંત સોરેનની પત્ની કલ્પના સોરેન, મુખ્ય પ્રધાન ચંપાઈ સોરેન અને કોંગ્રેસના કાર્યકરોનો આભાર માન્યો હતો. ખડગેએ કહ્યું કે રેલીમાં લાખો લોકો હતા, હું સતનામાં એક કાર્યક્રમમાં હાજરી આપી રહ્યો હતો, તેથી આવવામાં વિલંબ થયો. મને ખુશી છે કે ઈન્ડી બ્લોકની આટલી મોટી રેલીનું આયોજન કરવામાં આવ્યું.