વારાણસી અને વડોદરામાં નરેન્દ્ર મોદી આગળ

Updated: Friday, May 16, 2014, 10:42 [IST]

અમદાવાદ, 16 મે : ભાજપના વડાપ્રધાન પદના ઉમેદવાર અને ગુજરાતના મુખ્યમંત્રી નરેન્દ્ર મોદી વારાણસી તથા વડોદરા બંને બેઠકો ઉપરથી આગળ ચાલી રહ્યાં છે. વડોદરા બેઠક ઉપરથી મોદી 1 લાખ કરતા વધુ મતોથી આગળ ચાલી રહ્યાં છે.

નરેન્દ્ર મોદી બે બેઠકો ઉપરથી ચૂંટણી લડી રહ્યાં હતાં અને બંને બેઠકો ઉપર પ્રાથમિક ટ્રેંડ્ઝમાં નરેન્દ્ર મોદી આગળ ચાલી રહ્યાં છે. વારાણસીમાં મોદીનો મુકાબલો આમ આદમી પાર્ટીના અરવિંદ કેજરીવાલ તથા કોંગ્રેસના અજય રાય સામે છે, તો વડોદરામાં કોંગ્રેસના મધુસુદન મિસ્ત્રી તેમને પડકાર ફેંકી રહ્યાં છે, પરંતુ પ્રાથમિક વલણોમાં મોદી આગળ દેખાઈ રહ્યાં છે.

વડોદરા અને વારાણસી એમ બે બેઠકો ઉપરથી ચૂંટણી લડવા અંગે નરેન્દ્ર મોદી સામે વિરોધીઓએ ટિપ્પણીઓ કરી હતી, પરંતુ મોદીને બંને સ્થાનોના મતદારો તરફથી વિજયના સંકેત મળી રહ્યાં છે. વડોદરાએ તો ગત 30મી એપ્રિલે ખોબે-ખોબે મતદાન કર્યુ હતું અને વારાણસીમાં પણ ગત ચૂંટણી કરતા 10 ટકા વધુ મતદાન થયુ હતું.

વડોદરામાં નરેન્દ્ર મોદીને પડકાર ફેંકનાર મધુસુદન મિસ્ત્રી કોંગ્રેસના રાષ્ટ્રીય કક્ષાના નેતા ગણાય છે, તો વારાણસીમાં અરવિંદ કેજરીવાલે દિલ્હીવાળી કરવા માટે મોદીને પડકાર ફેંક્યો હતો, પરંતુ પ્રાથમિક વલણો પરથી સ્પષ્ટ છે કે કેજરીવાલ દિલ્હીના મુખ્યમંત્રી શીલા દીક્ષિતની જેમ મોદીને કદાચ હરાવી નહીં શકે.