હવે નરેન્દ્ર મોદી વીડિયો ગેમના સુપર હીરો અવતારમાં લડાઇ લડશે

નવી દિલ્હી, 18 મે : ગુજરાતના મુખ્યમંત્રી નરેન્દ્ર મોદી ટૂંક સમયમાં નવા અવતારમાં જોવા મળશે. અરે દેશના વડાપ્રધાન તરીકેની વાત અહીં નથી થઇ રહી. નરેન્દ્ર મોદી વીડિયો ગેમમાં સુપર હીરો તરીકેના અવતારમાં જોવા મળશે. આ અવતારમાં તેઓ ભ્રષ્ટાચાર વિરુદ્ધ લડતા અને જીતતા બતાવવામાં આવશે. નરેન્દ્ર મોદીને પીએમ પદના યોગ્ય દાવેદાર ગણાવતા લોકોના એક જૂથે 'modifyingindia' નામથી એક કેમ્પેઇન શરૂ કર્યું છે. આ કેમ્પેઇન અંતર્ગત નરેન્દ્ર મોદી આધારિત વીડિયો ગેમ્સ અને કોમિક્સ લાવવાની તૈયારી કરવામાં આવી રહી છે.

કેમ્પેઇન ચલાવનારા તેજેન્દર સિંહ બગ્ગાએ જણાવ્યું છે કે અમે લગભગ એક મહિના પહેલા આ કેમ્પેઇન શરૂ કર્યું છે. અત્યાર સુધી તેને ફેસબુક અને ટ્વિટર પર ચલાવવામાં આવી રહ્યું હતું અને એક ખાસ ટી-શર્ટ પણ રજૂ કરવામાં આવ્યું હતું. હવે આ કેમ્પેઇનને વધારે જોરદાર રીતે અમે ચલાવવા માંગીએ છીએ. આ ગ્રુપમાં જોડાયેલા લોકો નાના નાના ગ્રુપમાં વિવિધ કાર્ય કરી રહ્યા છે. એક ગ્રુપ વીડિયો ગેમ બનાવી રહ્યું છે તો એક ગ્રુપ કોમિક્સ તૈયાર કરવામાં વ્યસ્ત છે.આ કોમિક્સમાં 40 જ પાનામાં મોદીની બાયોગ્રાફી આપવાનો પ્રયાસ કરવામાં આવશે.

આ કોમિક્સ પહેલા હિન્દી ભાષામાં રજૂ કરવાનું આયોજન છે. ત્યાર બાદ જુદી જુદી ભારતીય ભાષાઓમાં તેને રજૂ કરવામાં આવશે. આ ઉપરાંત નમો નમોનું થીમ સોંગ પણ બનાવવામાં આવનાર છે. તેને બગ્ગા અને પંચતારિણી બેન્ડના સભ્ય આશિષ ભટ્ટે લખ્યું છે. આ કાશ્મીરી પંડિતોનું બેન્ડ છે. સોંગનું રેકોર્ડિંગ તઇ ચૂક્યું છે. તેને ભટ્ટ અને બેન્ડના અન્ય એક સભ્ય રાહુલ ટિક્કુએ ગાયું છે. આ ચાર મીનિટનું ગીત હિન્દીમાં છે. તેને 31 મેના રોજ એક રોક કોન્સર્ટમાં લોન્ચ કરવાની તૈયારી ચાલી રહી છે.

આ કોન્સર્ટમાં દેશભક્તિના ગીતો હશે અને છેલ્લે તેને લોન્ચ કરવામાં આવશે. આવતા મહિને અંગ્રેજીમાં પણ ગીત તૈયાર થઇ જશે. અંગ્રેજી ગીત રણ કિરત લખી રહ્યા છે. આ ગીતમાં ગુજરાતની સિદ્ધીઓ પણ વર્ણવવામાં આવી છે. દરેક મહિને નવી ભાષામાં ગીત લોન્ચ કરવામાં આવશે. આ કોન્સર્ટમાં એન્ટ્રી ફ્રી હશે. તેમાં કોઇ રાજનેતાને આમંત્રણ આપવામાં નહીં આવે.

બગ્ગા ત્રણ વર્ષ પહેલા ભાજપમાં હતા. પરંતુ હવે તેઓ નથી. અત્યાર સુધી આ ગ્રુપે મોદીનો સંપર્ક કરવાનો પ્રયત્ન કર્યો નથી અને ભાજપના કોઇ નેતાનો પણ સંપર્ક કરવામાં આવ્યો નથી. તેમણે જણાવ્યું કે અમે પરસ્પર નાણા એકત્રિત કરીને સમગ્ર આયોજન કરી રહ્યા છીએ.

English summary

Now Narendra Modi will fight as video game Super Hero.