Rahul Gandhi : રાહુલ ગાંધીએ EC પર વોટ ચોરીનો ગંભીર આરોપ લગાવ્યો

Rahul Gandhi : રાહુલ ગાંધી આજે પ્રેસ કોન્ફરન્સ કરીને ફરી એકવાર ચર્ચામાં આવ્યા છે. લોકસભામાં વિપક્ષના નેતા તરીકે તેઓ સતત ચૂંટણી પંચ અને સરકાર બંને પર આકરા પ્રહાર કરી રહ્યા છે.

તેમનો મુખ્ય આરોપ છે કે ચૂંટણી પંચ વોટ ચોરીમાં સામેલ છે, જેના કારણે ચૂંટણી પ્રક્રિયા પર સવાલો ઊભા થયા છે.

રાહુલ ગાંધીએ તાજેતરમાં દાવો કર્યો હતો કે બેંગલુરુ દક્ષિણ લોકસભા બેઠક હેઠળ આવતા મહાદેવપુરા વિધાનસભા ક્ષેત્રમાં 1 લાખથી વધુ નકલી વોટ મળ્યા છે.

તેમણે આ ખુલાસાને એટમ બોમ્બ ગણાવ્યો હતો. તેમણે કહ્યું છે કે તેઓ એક હાઈડ્રોજન બોમ્બ ફોડવાના છે. તેમના આ નિવેદને રાજકીય ગરમાવો વધારી દીધો છે.

રાહુલ ગાંધીની પ્રેસ કોન્ફરન્સની મુખ્ય વાતો

• રાહુલે સ્પષ્ટ કર્યું કે આજે જે માહિતી રજૂ કરવામાં આવી તે માત્ર એક પગલું છે. અસલી હાઈડ્રોજન બોમ્બ તો આવવાનો બાકી છે. આનો હેતુ યુવાઓને એ સમજાવવાનો છે કે ચૂંટણીમાં કેવી રીતે ગેરરીતિ થઈ રહી છે.
• તેમણે આરોપ લગાવ્યો કે ચૂંટણીમાં ગેરરીતિથી સૌથી વધુ દલિત અને ઓબીસી સમાજને નિશાન બનાવવામાં આવી રહ્યો છે. તેમણે કહ્યું કે, મને મારા દેશ અને બંધારણથી પ્રેમ છે અને હું કોઈપણ ભોગે તેનું રક્ષણ કરીશ.
• રાહુલે ભારપૂર્વક કહ્યું કે તેમના આરોપો 100% સાચા અને પુરાવા પર આધારિત છે, જેને કોઈપણ વ્યક્તિ ચકાસી શકે છે.
• તેમણે કર્ણાટકના આલંદ વિધાનસભા વિસ્તારનું ઉદાહરણ આપતા કહ્યું કે ત્યાં 6,018 વોટ ડિલીટ કરવામાં આવ્યા. તેમણે દાવો કર્યો કે આ સંખ્યા હકીકતમાં ઘણી વધારે હતી પણ આ મામલો આકસ્મિક રીતે પકડાઈ ગયો.
• રાહુલે સીધા મુખ્ય ચૂંટણી કમિશનર પર આરોપ મૂક્યો કે તેઓ એવા લોકોનું રક્ષણ કરી રહ્યા છે જેમણે લોકશાહીને નુકસાન પહોંચાડ્યું છે. તેમણે કહ્યું કે મુખ્ય ચૂંટણી કમિશનરની જવાબદારી લોકશાહીની સુરક્ષા કરવાની છે, પરંતુ તેઓ ગેરરીતિ કરનારાઓને બચાવી રહ્યા છે.
• પ્રેસ કોન્ફરન્સના અંતે રાહુલે ભારપૂર્વક કહ્યું કે, હું આ મંચ પરથી એવી કોઈ વાત નહીં કહું જે સાચી ન હોય. તેમણે પોતાને એવા વ્યક્તિ ગણાવ્યા જે દેશ, બંધારણ અને લોકશાહી પ્રક્રિયાને પ્રેમ કરે છે અને તેનું રક્ષણ કરવા માટે ઊભા છે. તેમણે ફરીથી સ્પષ્ટ કર્યું કે તેઓ પુરાવા સાથે લડી રહ્યા છે અને દરેક દાવાને ચકાસી શકાય છે.

English summary

Rahul Gandhi Accuses Election Commission of Vote Theft, Cites 'Atom Bomb' of Evidence