છત્તીસગઢમાં રાહુલ ગાંધીની મોટી જાહેરાત, સરકાર બનતા જ KG to PG free education scheme શરૂ કરાશે

કોંગ્રેસ નેતા અને પૂર્વ રાષ્ટ્રીય અધ્યક્ષ રાહુલ ગાંધી બે દિવસની છત્તીસગઢની મુલાકાતે પહોંચ્યા છે. રાહુલ ગાંધી 28 અને 29 ઓક્ટોબરે છત્તીસગઢમાં રોકાણ કરશે.

આજે તેમણે કાંકેર જિલ્લાના ભાનુપ્રતાપપુર અને ફરાસગાંવમાં ચૂંટણી સભાઓ સંબોધી. આ દરમિયાન રાહુલ ગાંધીએ મંચ પરથી ચૂંટણીની જાહેરાત કરતા કહ્યું કે, તેંદુપત્તા સંગ્રહ કરનારાઓને 4,000 રૂપિયાની પ્રોત્સાહક રકમ અપાશે.

આ સિવાય તેમણે કહ્યું કે, ગૌણ વન પેદાશો પર 10 રૂપિયાની વધારાની MSP આપવામાં આવશે. અહીં મોટી જાહેરાત કરતા તેમણે કહ્યું કે, છત્તીસગઢમાં કોંગ્રેસની સરકાર બનતાની સાથે જ KG થી PG સુધીનું શિક્ષણ મફત થશે, તમામ સરકારી શાળાઓ અને કોલેજોમાં શિક્ષણ મફત બની જશે.

રાહુલ ગાંધીએ કહ્યું કે, ગઈ ચૂંટણીમાં અમે તમને 2-3 મોટા વચનો આપ્યા હતા. કોંગ્રેસે વચનો આપ્યા હતા કે ખેડૂતોને તેમની મહેનતનું યોગ્ય ફળ મળવું જોઈએ, ખેડૂતોની લોન માફ કરવામાં આવશે, વીજળીના બિલ અડધા કરવામાં આવશે. ત્યારે બીજેપીના મોટા નેતાઓ કહેતા હતા કે આ વચનો પૂરા નહીં કરી શકાય પરંતુ અમે આ કામ 2 કલાકમાં કરી દીધું.

રાહુલ ગાંધીએ વધુમાં કહ્યું કે, સરકાર ચલાવવાના બે રસ્તા છે. પહેલો દેશ અને રાજ્યના સૌથી ધનિક લોકોને ફાયદો પહોંચાડવાનો છે. બીજી રીત રાજ્યના સૌથી ગરીબ લોકોને મદદ કરવાની છે. કોંગ્રેસ સરકાર ખેડૂતો, મજૂરો, બેરોજગાર અને ગરીબ લોકોને મદદ કરે છે. બીજેપીના લોકો મોટી મોટી વાતો કરે છે, પરંતુ અંતે તે અદાણીને મદદ કરે છે.

રાહુલ ગાંધીએ કહ્યું કે જ્યારે ખેડૂતના ખિસ્સામાં પૈસા આવે ત્યારે તે તેનો ઉપયોગ ગામમાં કરે છે અને તેનાથી ગામની અર્થવ્યવસ્થા વધે છે. બીજેપી સરકાર ખેડૂતોના પૈસા અદાણીને આપે છે. અદાણી વિદેશમાં જાહેર નાણાં ખર્ચે છે અને મકાનો ખરીદે છે.

રાહુલ ગાંધીએ કહ્યું કે, કોંગ્રેસ લોકોની મદદ માટે કામ કરે છે. કોંગ્રેસે વીજળીનું બિલ અડધું કરી દીધું જેથી પૈસા તમારા ખિસ્સામાં આવે. વડાપ્રધાન નરેન્દ્ર મોદી પર પ્રહાર કરતા તેમણે કહ્યું કે, બીજેપી અને વડાપ્રધાન કહે છે કે તે પછાત લોકો અને ઓબીસીની સરકાર ચલાવે છે પરંતુ તે જાતિની વસ્તી ગણતરીથી કેમ ડરે છે? વડાપ્રધાન મોદીજી તેમના ભાષણમાં જાતિ ગણતરીની વાત નથી કરતા.

રાહુલ ગાંધીએ કહ્યું કે, ભારત સરકાર ચલાવતા 90 અધિકારીઓમાંથી માત્ર 3 લોકો OBC કેટેગરીના છે. તેમણે પ્રશ્ન પૂછ્યો કે, શું ભારતમાં OBC સમુદાયની સંખ્યા 5 ટકા જ છે? ઓબીસી દેશની કરોડરજ્જુ છે. ભારતમાં 50 ટકાથી વધુ OBC વોર્ડ છે, પરંતુ તેમને બજેટમાં 5 ટકા ભાગીદારી મળી રહી છે.

ઓબીસી વર્ગ સાથે છેતરપિંડી થઈ રહી છે. OBC વર્ગના યુવાનોએ સમજવું પડશે કે બીજેપી અને નરેન્દ્ર મોદી તેમની સાથે અન્યાય કરી રહ્યા છે. જો છત્તીસગઢમાં સરકાર આવશે તો કોંગ્રેસ જાતિની વસ્તી ગણતરી કરાવશે.

રાહુલ ગાંધીએ કહ્યું કે, બીજેપીના લોકો આદિવાસીઓ માટે વનવાસી શબ્દ વાપરે છે. આદિવાસીઓ ભારતના પ્રથમ માલિક હતા, તેમને જમીનનો અધિકાર મળવો જોઈએ. વનવાસી શબ્દ એમ નથી કહેતો કે તેમને તેમનો અધિકાર મળવો જોઈએ. તેનો અર્થ જંગલમાં રહેતા લોકો.

રાહુલ ગાંધીએ વધુમાં કહ્યું કે, વનવાસી શબ્દ ભારતના આદિવાસીઓનું અપમાન છે. આ શબ્દ આદિવાસીઓની સંસ્કૃતિ અને ઇતિહાસ પર હુમલો છે.

કોંગ્રેસે PESA કાયદો લાવીને આદિવાસીઓને તેમની જમીનનો અધિકાર આપ્યો. ગ્રામસભાને પૂછ્યા પછી જ આદિવાસીઓ પાસેથી જમીન લઈ શકાશે. બીજેપીએ ગ્રામસભામાંથી મંજૂરીનો નિયમ રદ કર્યો. આદિવાસી અને PESA કાયદાઓને અંદરથી પોકળ કર્યા. રાહુલ ગાંધીએ કહ્યું કે છત્તીસગઢમાં કોંગ્રેસની સરકાર છે, તેથી આવું ન થઈ શકે.

English summary

Rahul Gandhi's big announcement in Chhattisgarh