Satyapal malik Death : જમ્મુ-કાશ્મીરના પૂર્વ રાજ્યપાલ સત્યપાલ મલિકનું નિધન, જાણો વિવાદાસ્પદ રાજકીય સફર
Satyapal malik Death : જમ્મુ-કાશ્મીરના પૂર્વ રાજ્યપાલ અને રાજકારણના દિગ્ગજ નેતા સત્યપાલ મલિકનું નિધન થયું છે. એક સમયે ભારતીય જનતા પાર્ટી (BJP)ના ટોચના નેતાઓમાંના એક ગણાતા મલિકે ચાર રાજ્યોના રાજ્યપાલ તરીકે સેવા આપી હતી.
તેમનું જીવન ભલે રાજકીય ઉતાર-ચઢાવથી ભરેલું રહ્યું હોય, પણ છેલ્લા કેટલાક વર્ષોમાં તેમના સંબંધો મોદી સરકાર સાથે બગડ્યા હતા. તેમણે ખાસ કરીને પુલવામા હુમલા અને ખેડૂત આંદોલનને લઈને કેન્દ્ર સરકાર પર આકરા પ્રહારો કર્યા હતા.
સત્યપાલ મલિકનો રાજકીય પ્રવાસ લગભગ 50 વર્ષ લાંબો હતો, જેમાં તેમણે અનેક પક્ષો બદલ્યા. તેઓ હંમેશા પોતાની જાતને જાટ અને કિસાન નેતા તરીકે રજૂ કરતા હતા. તેમના રાજકીય ગુરુ તરીકે તેઓ ચૌધરી ચરણ સિંહને માનતા હતા.
સત્યપાલ મલિકનો જન્મ 24 જુલાઈ 1946ના રોજ ઉત્તર પ્રદેશના બાગપત જિલ્લાના હિસાવાડા ગામમાં થયો હતો. બાળપણમાં જ પિતા ગુમાવ્યા બાદ તેઓ વિદ્યાર્થી જીવનથી જ રાજકારણમાં સક્રિય બન્યા.
1974માં તેઓ ચૌધરી ચરણ સિંહના ભારતીય ક્રાંતિ દળની ટિકિટ પર બાગપતથી ધારાસભ્ય બન્યા. 1980માં લોકદળની ટિકિટ પર રાજ્યસભા પહોંચ્યા. કટોકટી દરમિયાન તેમણે કોંગ્રેસનો સખત વિરોધ કર્યો અને જેલ પણ ગયા.
1984માં મલિક કોંગ્રેસમાં જોડાયા, પરંતુ થોડા સમય પછી તેમણે જન મોર્ચા પાર્ટીની સ્થાપના કરી, જેનો પછીથી જનતા દળમાં વિલય કર્યો. 1989માં તેઓ અલીગઢથી સાંસદ બન્યા. ત્યારબાદ સમાજવાદી પાર્ટીમાં પણ જોડાયા અને 1996માં અલીગઢથી ચૂંટણી લડ્યા, પણ હારી ગયા. 2004માં તેઓ ભાજપમાં જોડાયા અને 2012માં તેમને પક્ષના રાષ્ટ્રીય ઉપાધ્યક્ષ તરીકે નિયુક્ત કરવામાં આવ્યા.
2017માં તેમને બિહારના રાજ્યપાલ બનાવવામાં આવ્યા. 2018માં તેમને જમ્મુ-કાશ્મીરના રાજ્યપાલ તરીકેની મહત્વની જવાબદારી સોંપાઈ, જ્યારે કલમ 370 હટાવવાનો નિર્ણય લેવામાં આવ્યો હતો. આ પછી તેઓ ગોવા (2019) અને મેઘાલય (2020)ના રાજ્યપાલ પણ રહ્યા.
ભાજપ સાથેના તેમના સંબંધોમાં કડવાશ ખેડૂત આંદોલન પછી આવી. મેઘાલયના રાજ્યપાલ તરીકે તેમણે ખેડૂતોના સમર્થનમાં એક નિવેદન આપ્યું હતું, જેમાં તેમણે કહ્યું હતું કે દિલ્હીની સરહદો પર 700 ખેડૂતો મૃત્યુ પામ્યા, પણ દિલ્હીથી સંવેદનાનો એક પત્ર પણ ન આવ્યો.
આ સિવાય તેમણે પુલવામા હુમલાને લઈને પણ મોદી સરકાર પર સીધા આરોપ મૂક્યા હતા. તેમણે દાવો કર્યો હતો કે કેન્દ્ર સરકારની બેદરકારીને કારણે આ હુમલો થયો અને ભાજપે ચૂંટણીમાં આ ઘટનાનો રાજકીય લાભ લીધો હતો. આ નિવેદનોને કારણે તેઓ રાજકીય વર્તુળોમાં ભારે ચર્ચામાં રહ્યા.
Click it and Unblock the Notifications
Sign in with Google
