Covid Guidelines : કોરોના વાયરસ અંગે એલર્ટ રહે રાજ્યો, કેન્દ્ર સરકારે જાહેર કરી નવી કોવિડ ગાઇડલાઇન
Covid Guidelines : તાજેતરમાં સમગ્ર દેશમાં કોરોના સંક્રમણમાં વધારો થઇ રહ્યો છે. કેન્દ્ર સરકાર એલર્ટ મોડ પર છે. કેન્દ્ર સરકાર દ્વારા ઘણા રાજ્યો માટે ગાઇડલાઇન્સ જાહેર કરવામાં આવી છે.
કેન્દ્રીય આરોગ્ય પ્રધાન મનસુખ માંડવિયાએ શુક્રવારની બપોરે રાજ્યો અને કેન્દ્રશાસિત પ્રદેશોના આરોગ્ય પ્રધાનો સાથે બેઠક યોજી હતી.
વર્ચ્યુઅલ રીતે યોજાયેલી આ બેઠકમાં કોરોનાને લઈને સમીક્ષા કરવામાં આવી હતી. બેઠક બાદ રાજ્ય સરકારો માટે માર્ગદર્શિકા જાહેર કરવામાં આવી છે.
રાજ્ય સરકારોએ સતર્ક રહેવું જોઈએ
કેન્દ્રીય સ્વાસ્થ્ય મંત્રીએ રાજ્યોને સતર્ક રહેવા અને કોવિડ-19 મેનેજમેન્ટ માટે સંપૂર્ણ રીતે તૈયાર રહેવાની સલાહ આપી છે. તેમણે રાજ્યના આરોગ્ય મંત્રીઓને 10 અને 11 એપ્રિલના રોજ તમામ હોસ્પિટલોમાં ઈન્ફ્રાસ્ટ્રક્ચર અંગે મોકડ્રીલ કરવા જણાવ્યું છે.
આ ઉપરાંત 8 અને 9 એપ્રિલના રોજ જિલ્લા વહીવટી તંત્ર અને આરોગ્ય અધિકારીઓને પણ આરોગ્યની તૈયારીઓની સમીક્ષા કરવા તાકીદ કરવામાં આવી છે.
પોંડીચેરીમાં માસ્ક પહેરવું ફરજિયાત
આવા સમયે હવે પોંડીચેરીમાં માસ્ક પહેરવાનું ફરજિયાત કરવામાં આવ્યું છે. જિલ્લા કલેક્ટર ઇ વલ્વને જણાવ્યું હતું કે, હવે રાજ્યમાં જાહેર સ્થળો, બીચ રોડ, પાર્ક અને થિયેટરમાં માસ્ક પહેરવું જરૂરી બનશે. આ સિવાય હોસ્પિટલ, હોટેલ, બાર, રેસ્ટોરા, દારૂની દુકાનો, હોસ્પિટાલિટી અને મનોરંજન ક્ષેત્રો, સરકારી કચેરીઓ અને વ્યાપારી સંસ્થાઓમાં કામ કરતા કર્મચારીઓ ફરજિયાતપણે માસ્ક પહેરશે.
ચાર દિવસમાં કોરોનાના દર્દીઓમાં બમણો વધારો
દેશમાં માત્ર ચાર દિવસમાં કોરોનાના કેસ બમણા થઈ ગયા છે. સ્વાસ્થ્ય મંત્રાલયે જણાવ્યું હતું કે, છેલ્લા 24 કલાકમાં કોરોના સંક્રમણના કુલ 6,050 નવા કેસ મળી આવ્યા છે. આ સિવાય સક્રિય દર્દીઓની સંખ્યા હવે વધીને 28,303 થઈ ગઈ છે.
24 કલાકમાં 14 દર્દીઓના મોત
કેન્દ્રીય મંત્રાલયે જણાવ્યું હતું કે, આ સમયગાળા દરમિયાન 14 દર્દીઓએ પોતાનો જીવ ગુમાવ્યો છે. મૃતકોનો આંકડો વધીને 5 લાખ 30 હજાર 943 થઈ ગયો છે. મહારાષ્ટ્રમાં ત્રણ, કર્ણાટક અને રાજસ્થાનમાં બે-બે, દિલ્હી, ગુજરાત, હરિયાણા, હિમાચલ પ્રદેશ, જમ્મુ-કાશ્મીર અને પંજાબમાં એક-એક દર્દીના મોત થયા છે.
Click it and Unblock the Notifications
Sign in with Google
