હૂમાયુ કબીર વિડિયો વિવાદ બાદ AIMIM એ AJUP સાથેનું ગઠબંધન તોડ્યું

શુક્રવાર, 10 એપ્રિલ, 2026: પશ્ચિમ બંગાળ વિધાનસભા ચૂંટણી 2026 પહેલા રાજ્યના રાજકારણમાં એક મોટો અને અણધાર્યો વળાંક આવ્યો છે. અસદુદ્દીન ઓવૈસીની પાર્ટી AIMIM એ હુમાયુ કબીરની 'આમ જનતા ઉન્નયન પાર્ટી' (AJUP) સાથેનું પોતાનું ગઠબંધન તોડી નાખ્યું છે. આ અંગેની માહિતી AIMIM દ્વારા 'X' પ્લેટફોર્મ પર જાહેર કરવામાં આવી હતી.

આ ગઠબંધન તૂટવાનું મુખ્ય કારણ તૃણમૂલ કોંગ્રેસ (TMC) દ્વારા 9 એપ્રિલના રોજ જાહેર કરાયેલો એક વીડિયો હોવાનું મનાય છે. AIMIM એ સ્પષ્ટતા કરી કે તેઓ એવા નિવેદનોનું સમર્થન કરી શકતા નથી, જે મુસ્લિમ સમુદાયની ગરિમા પર સવાલ ઉભા કરે. આ વીડિયો સામે આવ્યા પછી તરત જ AIMIM એ કબીરની પાર્ટી સાથેના સંબંધો સમાપ્ત કરી દીધા હતા.

પાર્ટીએ 'X' પર લખ્યું હતું કે, "હુમાયુ કબીરના ખુલાસાઓથી એ સ્પષ્ટ થઈ ગયું છે કે બંગાળના મુસલમાનો કેટલા નબળા છે. AIMIM આવા કોઈપણ નિવેદન સાથે પોતાને જોડી શકતી નથી, જેનાથી મુસ્લિમોના સન્માન પર પ્રશ્ન ઉભા થાય. આજની તારીખે, AIMIM એ કબીરની પાર્ટી સાથેનું પોતાનું ગઠબંધન તોડી નાખ્યું છે."

AIMIM એ વધુમાં જણાવ્યું કે, "બંગાળના મુસલમાનો સૌથી ગરીબ, ઉપેક્ષિત અને શોષિત સમુદાયોમાંથી એક છે. દાયકાઓ સુધી બિનસાંપ્રદાયિક શાસન હોવા છતાં, તેમના માટે કંઈ ખાસ નથી થયું." પાર્ટીની નીતિ હાંસિયામાં ધકેલાઈ ગયેલા સમુદાયોને સ્વતંત્ર રાજકીય અવાજ આપવાની છે.

AIMIM એ સ્પષ્ટ કર્યું છે કે તેઓ બંગાળ ચૂંટણી 2026 સ્વતંત્ર રીતે લડશે અને ભવિષ્યમાં કોઈપણ અન્ય પક્ષ સાથે કોઈ ગઠબંધન નહીં કરે. આ નિર્ણયથી રાજ્યની રાજકીય ગતિવિધિઓમાં એક નવો અધ્યાય શરૂ થશે, જેના ભવિષ્યના પરિણામો પર સૌની નજર રહેશે.

TMC દ્વારા પ્રકાશિત કરાયેલા કથિત વીડિયોમાં એક વ્યક્તિ, જે હુમાયુ કબીર જેવો દેખાય છે, તે ભાજપના નેતાઓ સાથે ₹1000 કરોડના સોદાની વાત કરતો નજરે પડે છે. અંદાજે 19 મિનિટના આ વીડિયોમાં એવો પણ દાવો કરાયો છે કે જો તેમની પાર્ટી 60-70 બેઠકો જીતી જાય, તો તેમને નાયબ મુખ્યપ્રધાન બનાવી શકાય છે.

વાયરલ વીડિયોમાં કબીર જેવા દેખાતા વ્યક્તિને એમ કહેતા સાંભળી શકાય છે કે, "હજાર કરોડ રૂપિયા આવશે. બાબરી મસ્જિદ બનશે કે નહીં, તે છોડો. મુસલમાનો ઘણા ભોળા છે, તેમને મૂર્ખ બનાવવા સરળ છે." જોકે, હુમાયુ કબીરે આ વીડિયોને નકલી અને AI-જનરેટેડ ગણાવીને ફગાવી દીધો છે, જ્યારે TMC આ મામલે આક્રમક વલણ ધરાવે છે.

નોંધનીય છે કે, હુમાયુ કબીરે 25 માર્ચના રોજ AIMIM સાથે ગઠબંધનની ઘોષણા કરી હતી અને તે સમયે તેમણે અસદુદ્દીન ઓવૈસીને પોતાના 'મોટા ભાઈ' ગણાવ્યા હતા. 3 જાન્યુઆરી, 1963ના રોજ જન્મેલા હુમાયુ કબીર 2021 થી ભરતપુરના ધારાસભ્ય છે.

કબીર અગાઉ તૃણમૂલ કોંગ્રેસના સભ્ય પણ રહી ચૂક્યા છે અને મમતા બેનર્જીના પ્રથમ કાર્યકાળમાં રાજ્યમંત્રી તરીકે પણ સેવા આપી હતી. બાબરી શૈલીની મસ્જિદના નિર્માણની પહેલ કરવા બદલ TMC એ તેમને ડિસેમ્બર 2025 માં પાર્ટીમાંથી હાંકી કાઢ્યા હતા. ત્યારથી તેમણે 'આમ જનતા ઉન્નયન પાર્ટી' (AJUP) ની સ્થાપના કરી અને હાલમાં તેના અધ્યક્ષ તરીકે કાર્યરત છે.

English summary

AIMIM has ended its alliance with AJUP amid a video controversy involving Humayu Kabir, declaring an independent bid in the West Bengal 2026 assembly elections and emphasising a focus on representing marginalised Muslim communities.