Women's T20 World Cup 2023 : વેસ્ટ ઈન્ડિઝ સામે ભારતની 6 વિકેટે જીત, દીપ્તિ શર્માના નામે નવો રેકોર્ડ
દીપ્તિ શર્માએ મોટો રેકોર્ડ પોતાના નામે કર્યો છે. વેસ્ટ ઈન્ડિઝ સામે ત્રણ વિકેટ લઈને દીપ્તિ ટી-20માં ભારત માટે સૌથી વધુ વિકેટ લેનારી બોલર બની ગઈ છે.
નવી દિલ્હી : મહિલા T20 વર્લ્ડ કપમાં ભારતીય ટીમનું શાનદાર પ્રદર્શન યથાવત છે. વેસ્ટ ઈન્ડિઝ સામે ભારતીય મહિલા ટીમે T20 વર્લ્ડ કપમાં બીજી જીત નોંધાવી છે. પાકિસ્તાન બાદ ભારતે વેસ્ટ ઈન્ડિઝને છ વિકેટે હરાવી જીતનો સિલસિલો ચાલુ યથાવત રાખ્યો છે. ઈંગ્લેન્ડ સામે મેચમાં હાર બાદ વેસ્ટ ઈન્ડિઝને ટુર્નામેન્ટમાં વધુ એક હારનો સામનો કરવો પડ્યો છે. ભારત તરફથી કેપ્ટન હરમનપ્રીત કૌરે 33 રન અને રિચા ઘોષે અણનમ 44 રનની ઇનિંગ રમી.
ટોસ જીતીને પ્રથમ બેટિંગ કરતા વેસ્ટ ઈન્ડિઝની ટીમે છ વિકેટ ગુમાવીને 118 રન બનાવ્યા હતા. ભારત તરફથી દીપ્તિ શર્માએ ચાર ઓવરમાં 15 રન આપીને ત્રણ વિકેટ ઝડપી હતી. આ સાથે દીપ્તિ શર્માએ મોટો રેકોર્ડ પોતાના નામે કર્યો છે. વેસ્ટ ઈન્ડિઝ સામે ત્રણ વિકેટ લઈને દીપ્તિ ટી-20માં ભારત માટે સૌથી વધુ વિકેટ લેનારી બોલર બની ગઈ છે. અહીં તમને જણાવી દઈએ કે T20 ઈન્ટરનેશનલમાં સૌથી વધુ વિકેટ લેવાનો રેકોર્ડ વેસ્ટ ઈન્ડિઝની અનીસા મોહમ્મદના નામે છે અને તેને 125 વિકેટ લીધી છે.
119 રનના ટાર્ગેટ માટે મેદાનમાં ઉતરેલી ભારતની ટીમને શેફાલી વર્માએ પહેલી જ ઓવરમાં ત્રણ ચોગ્ગા ફટકારીને સારી શરૂઆત અપાવી હતી. 32ના સ્કોર પર ભારતને પહેલો ફટકો સ્મૃતિ મંધાનાના રૂપમાં લાગ્યો. મંધાનાને વિકેટકીપર રશદા વિલિયમ્સે સ્ટમ્પ આઉટ કરી હતી. મંધાના સાત બોલમાં 10 રન રમીને આઉટ થઈ ગઈ હતી.
પાકિસ્તાન સામે શાનદાર અડધી સદી ફટકારીને ટીમને જીત અપાવનારી જેમિમા રોડ્રિગ્સ આ મેચમાં કંઈ ખાસ કરી શકી નહીં. હેલી મેથ્યુઝે જેમિમા રોડ્રિગ્સને તેના જ બોલ પર કેચ આઉટ કરી પેવેલિયન પરત મોકલી હતી. જેમિમા એક રન બનાવીને પેવેલિયન પરત ફરી હતી. ત્યારબાદ શેફાલી 23 બોલમાં 28 રનની ઈનિંગ રમીને આઉટ થઈ ગઈ હતી.
Click it and Unblock the Notifications
Sign in with Google
