રાજકોટ: 8 વર્ષનો બાળક ઢળી પડ્યો, હાર્ટ એટેકની આશંકા

Rajkot, heart attack: ગુજરાતમાં હાર્ટ એટેકના કેસમાં વધારો થઈ રહ્યો છે. નાના બાળકોને પણ હવે હાર્ટ એટેક આવવાના કિસ્સા સામે આવી રહ્યા છે. આવા જ સમાચાર રાજકોટથી સામે આવી રહ્યાં છે. જ્યાં ધોરણ 4માં અભ્યાસ કરતા બાળકનું હાર્ટ એટેકથી મોત થયાનું અનુમાન છે.

ધોરણ 4માં અભ્યાસ કરતા પૂર્વાગ નેમિશભાઈ ધામેચા બે દિવસથી ઝાડા ઊલટીની બીમારીમાં સપડાયો હતો. આ બાળક માટે તેના પરિવારે ખાનગી દવાખાનામાંથી દવા લીધી હતી. બાળક પોતાના ઘરે જમવા બેઠો હતો, ત્યારે ઊલટી થતાં તે બેભાન હાલતમાં ઢળી પડ્યો હતો.

પૂર્વાગને વધુ સારવાર મળે તે પહેલાં જ તેનું મોત નિપજ્યું હતું. આ બાળકનું મોત હાર્ટ એટેકના કારણે થયું હોવાનો તબીબોએ અભિપ્રાય આપ્યો હતો. હાલ પોસ્ટમોર્ટમ રિપોર્ટની રાહ જોવાઇ રહી છે, જે બાદ સાચી હકીકત સામે આવશે.

ઉલ્લેખનીય છે કે, થોડા દિવસ પહેલા રાજકોટના જેતપુરમાં પરપ્રાંતિય મજૂરને હાર્ટ એટેક આવ્યો હતો. જૂની સાંકળી ગામે સીમ વિસ્તારની વાડીમાં ખેત મજૂરી કરતા મજૂરને હાર્ટ એટેક આવતા જેતપુર સરકારી હોસ્પિટલ સારવાર અર્થે ખસેડાતા ફરજ પરના ડૉક્ટરે મૃત જાહેર કર્યો હતો. જીતન ગંગારામ નામના 20 વર્ષીય યુવકનું હાર્ટ એટેકના કારણે નિધન થતાં પરિવારમાં શોક ફેલાયો હતો.

English summary

Rajkot: 8-year-old boy falls, heart attack suspected