વિસર્જન દરમિયાન દરિયામાં ડૂબ્યો 13 વર્ષનો બાળક, 36 કલાક બાદ ગણેશ મૂર્તિએ આ રીતે બચાવ્યો જીવ
Ganpati Visarjan 2023 : સુરતના ડુમસ બીચ પર શુક્રવારના રોજ દરિયામાં ડૂબી જવાથી ગુમ થયેલો કિશોર 36 કલાક બાદ જીવતો મળી આવ્યો છે. ગત શુક્રવારે સુરતમાં રહેતો લખન દેવીપૂજક નામનો 13 વર્ષનો બાળક તેની દાદી અને ભાઈ-બહેન સાથે માતાજીના દર્શન કર્યા બાદ સુરતના ડુમસના દરિયા કિનારે ગણેશ વિસર્જન જોવા ગયો હતો. જ્યાં તે તેના ભાઈ સાથે દરિયામાં તરવા ગયો હતો. આ દરમિયાન લખન અને તેનો ભાઈ દરિયામાં ડૂબવા લાગ્યા હતા.
આ અકસ્માતમાં લખનના ભાઈને લોકોએ બચાવી લીધો હતો, પરંતુ લખન દરિયામાં ગુમ થઈ ગયો હતો. શોધખોળ કરવા છતાં લખન મળી આવ્યો ન હતો. બીજા દિવસે પણ વહીવટીતંત્ર અને પરિવારજનોએ તેમની શોધખોળ ચાલુ રાખી હતી. જે બાદ પરિવારને સંદેશો મળ્યો કે, લખનને માછીમારોએ દરિયામાં બચાવી લીધો છે.
આવા સમયે જ્યારે પુત્રના મૃતદેહની શોધખોળ કરી રહેલા પિતાને પોલીસ તરફથી લખન જીવતો હોવાની માહિતી મળી, ત્યારે તેના જીવનમાં એક નવી ઉર્જા આવી ગઈ અને તેના ચહેરા પર આંસુની સાથે ખુશીની લહેર દોડી ગઈ હતી.
આ રીતે બચ્યો લખનનો જીવ - જણાવવામાં આવી રહ્યું છે કે, નવદુર્ગા નામની બોટમાં લગભગ 8 માછીમારો દરિયામાં માછીમારી કરી રહ્યા હતા. પછી તેમણે જોયું કે, એક બાળક દરિયાની વચ્ચે લાકડાના પાટિયા પર બેઠું હતું અને હાથ ઊંચા કરીને મદદ માંગી રહ્યું હતું. જે બાદ માછીમારો બોટ લઈને આ બાળક સુધી પહોંચ્યા હતા. તેને બોટમાં બેસાડીને પૂછપરછ કરી હતી. તે ગણેશ મૂર્તિના અવશેષો પર બેઠો હતો, જ્યાંથી તેને બચાવી લેવામાં આવ્યો હતો. ગણેશજીના લાકડાના સ્ટેન્ડની મદદથી મૃત્યુને હરાવીને 13 વર્ષનો બાળક જીવતો પાછો આવ્યો હતો.
જે બાદ માછીમારોએ બાળકની શોધખોળ અંગે તાત્કાલિક વહીવટીતંત્રને જાણ કરતાં જાણવા મળ્યું હતું કે, જે બાળક ડૂબી ગયો હતો, અને શુક્રવારે બપોરે સુરતના ડુમસ બીચ પરથી ગુમ થયો હતો, તે એ જ બાળક હતું. જ્યાંથી બાળક દરિયામાં મળી આવ્યું હતું, ત્યાંથી બીચ લગભગ 14 નોટિકલ માઈલ દૂર હતો. 12 કલાક બાદ રવિવારની સવારે માછીમારો બાળકને લઈને બીલીમોરા નજીક ધોલાઈ બંદર પહોંચ્યા હતા અને તેને પોલીસને હવાલે કર્યો હતો.
ડુમસ દરિયામાં ડૂબી ગયા બાદ ગુમ થયેલા લખનને 36 કલાક બાદ ધોલાઈ બંદર ખાતે ઉતારવામાં આવ્યો હતો. આ પછી તબીબોએ નવસારીની હોસ્પિટલમાં તેની પ્રાથમિક તપાસ કરી હતી, જ્યાં તે સ્વસ્થ જણાયો હતો. આઈસીયુમાં 24 કલાક ડોકટરોના નિરીક્ષણ હેઠળ રાખ્યા બાદ તેને પરિવારને સોંપવામાં આવ્યો હતો.
Click it and Unblock the Notifications
Sign in with Google
