રશિયાના રાષ્ટ્રપતિ પુતિનની ખુરશી ખતરામાં, બહુ જલ્દી નવા રાષ્ટ્રપતિ મળવાનો બાગી વૈગનરનો દાવો

યુક્રેન યુદ્ધમાં રશિયાને સાથ આપનારા વૈગનર ગ્રુપે બગાવત કરી દીધી છે. હવે આ ગ્રુપના લડવૈયાઓ રશિયાની રાજધાની મોસ્કો તરફ ઝડપથી આગળ વધી રહ્યા છે. વૈગનરે દાવો કર્યો છે કે રશિયાને બહુ જલ્દી નવા રાષ્ટ્રપતિ મળવાના છે.

તખ્તાપલટનો પ્રયાસ કરી રહેલું વૈગનર ગ્રુપ રાજધાની મોસ્કો તરફ આગળ વધી રહ્યું છે. આ દરમિયાન પુતિને દેશને પોતાના સંબોધનમાં કહ્યું છે કે દેશદ્રોહીઓને કચડી નાખવામાં આવશે. પુતિનની ધમકી બાદ વેગનર ગ્રૂપના વડા યેવગેની પ્રિગોજિને વળતો પ્રહાર કરતા કહ્યું કે, તેમણે તેમના ભાષણ દરમિયાન ખોટી પસંદગી કરી. રશિયાને ટૂંક સમયમાં નવા રાષ્ટ્રપતિ મળશે.

રશિયામાં ગૃહ યુદ્ધની સ્થિતી વચ્ચે સોશિયલ મીડિયા પર વાયરલ વીડિયોમાં સશસ્ત્ર લડવૈયાઓ અને વાહનો રશિયાના દક્ષિણી આર્મી હેડક્વાર્ટરની બહાર જોવા મળી રહ્યા છે.

બીબીસી અનુસાર, યુક્રેન વિરુદ્ધ ચાલી રહેલા યુદ્ધમાં રોસ્ટોવ-ઓન-ડોન શહેરના આ આર્મી હેડક્વાર્ટરમાં યુદ્ધ સંબંધિત મહત્વપૂર્ણ નિર્ણયો લેવામાં આવે છે. જો કે, હજુ એ સ્પષ્ટ નથી કે આ સશસ્ત્ર લડવૈયાઓ રશિયન સેનાના સૈનિકો છે કે ભાડૂતી ગ્રુપ વૈગનર લડવૈયા.

યેવગેની પ્રિગોજિને એક વીડિયો સંદેશ જારી કરીને કહ્યું કે, ઘણા રશિયન સૈનિકો તેના સમર્થનમાં છે. ટેલિગ્રામ પર પોસ્ટ કરવામાં આવેલી એક ઓડિયો ક્વિપમાં તેણે કહ્યું કે, જેણે તેના લડવૈયાઓને માર્યા અને યુક્રેન યુદ્ધમાં હજારો સૈનિકોના મૃત્યુનું કારણ છે તેને સજા કરવામાં આવશે.

બીજી તરફ રશિયાના રાષ્ટ્રપતિ પુતિને દેશને સંબોધિત કરતા કહ્યું કે, વૈગનરે પીઠમાં છરો માર્યો છે. તેણે સેનાને પડકાર ફેંક્યો છે. દેશની જનતા સાથે છેતરપિંડી કરવામાં આવી છે. અમે દરેક કિંમતે નાગરિકોની સુરક્ષા કરીશું.

English summary

Bagi Wagner claims that Russia will get a new president very soon