Chile Forest Fire: ચિલીના જંગલમાં આગ લાગતા 99 લોકોના મોત, સેંકડો ગુમ, 1600 ઘર બળીને રાખ
Chile Forest Fires: મધ્ય ચિલીમાં જંગલમાં લાગેલી આગના કારણે 99 લોકોના મોત થયા છે. અત્યાર સુધીમાં 32 મૃતદેહોની ઓળખ કરવામાં આવી છે. જો કે, અધિકારીઓના જણાવ્યા મુજબ મૃત્યુઆંક વધવાની શક્યતા છે. આગને કાબુમાં લેવા માટે 19 હેલિકૉપ્ટર અને 450થી વધુ ફાયર ફાઈટર તૈનાત કરવામાં આવ્યા છે.
અધિકારીઓના જણાવ્યા મુજબ 1,600 ઘરો નાશ પામ્યા છે. શનિવારે મધ્ય ચિલીમાં વાલપરાઈસો વિસ્તારના ઘણા વિસ્તારોમાં ધૂમાડો છવાઈ ગયો હતો. હજારો લોકોને તેમના ઘર ખાલી કરવા અપીલ કરવામાં આવી છે.
ચિલીના અધિકારીઓએ જણાવ્યું હતું કે દરિયાકાંઠાના પ્રવાસી શહેર વિના ડેલ મારની આસપાસના વિસ્તારો પ્રભાવિત થયા છે. બચાવ ટીમ તમામ અસરગ્રસ્ત વિસ્તારોમાં પહોંચવા માટે સંઘર્ષ કરી રહી છે.
ગૃહ મંત્રી કેરોલિના તોહાના જણાવ્યા મુજબ વાલપરાઈસોમાં સ્થિતિ સૌથી ગંભીર છે. દેશ 2010ના ભૂકંપ પછીની સૌથી ખરાબ આફતનો સામનો કરી રહ્યો છે. વાલપરાઈસો વિસ્તારમાં ત્રણ આશ્રયસ્થાનો ઉભા કરવામાં આવ્યા છે. રાષ્ટ્રપતિ ગેબ્રિયલ બોરિકે કહ્યું કે પરિસ્થિતિ ખરેખર ખૂબ જ મુશ્કેલ છે. રાષ્ટ્રપતિ બોરીકે ચિલીના લોકોને બચાવ કાર્યકરોને સહકાર આપવા વિનંતી કરી હતી. તેમણે કહ્યું કે જો તમને તે જગ્યા છોડવા માટે કહેવામાં આવે તો તે કરવામાં અચકાશો નહીં.
તમને જણાવી દઈએ કે ઉનાળાના મહિનાઓ દરમિયાન ચિલીમાં જંગલમાં આગ લાગવી અસામાન્ય નથી. ગયા વર્ષની વિક્રમી ગરમીમાં લગભગ 27 લોકોના મોત થયા હતા અને 400,000 હેક્ટરથી વધુ જમીનને અસર થઈ હતી. તોહાએ કહ્યું કે શુક્રવાર અને શનિવાર વચ્ચે જંગલમાં લાગેલી આગથી પ્રભાવિત વિસ્તાર 30,000થી વધીને 43,000 હેક્ટર થઈ ગયો. અધિકારીઓ માટે સૌથી મોટી ચિંતા એ છે કે આગ શહેરી વિસ્તારોની ખૂબ નજીક પણ ભડકી છે.
Click it and Unblock the Notifications
Sign in with Google
