પાકિસ્તાનમાં હિન્દુ યુવતીનું જબરદસ્તી ધર્માંતરણ, હિન્દુ સમુદાય વિરોધમાં ઉતર્યો

ઇસ્લામાબાદ, 30 માર્ચ : પાકિસતાનમાં એક હિન્દુ છોકરીનું બળજબરીપૂર્વક ધર્માંતરણ કરાવવામાં આવ્યું હોવાનો કિસ્સો બહાર આવ્યો છે. પાકિસ્તાનના સિંધ પ્રાંતમાં રહેતી એક હિન્દુ છોકરીનું અપહપણ કર્યા બાદ તેનું જબરદસ્તી ધર્માંતરણ કરાવવામાં આવ્યું અને ત્યાર બાદ તેના લગ્ન મુસ્લિમ છોકરા સાથે કરાવી દેવામાં આવ્યા છે. આ ઘટનાના વિરોધથી ક્રોધે ભરાયેલો હિન્દુ સમાજ રસ્તાઓ પર વિરોધ માટે ઉતરી આવ્યો છે. આ કારણે શુક્રવારે જેકબાબાદમાં હિન્દુ પંચાયત માટે થનારી ચૂંટણીઓ પણ મુલતવી રાખવામાં આવી હતી.

જેકબબાદની ઝાકરી સ્ટ્રીટ વિસ્તારમાંથી પ્રાપ્ત માહિતી અનુસાર સોનાના વેપારી અશોકકુમારની દીકરી ગંગાનું અપહરણ કરી તેને સોનાના વેપારી બહાદર અલીના દીકરા આસિફ અલી સાથે અમરોત શરીફની દરગાહ પર જબરદસ્તી લગ્ન કરાવી દીધા હતા.

આ અંગે સમાચારપત્ર ડોનના અહેવાલ અનુસાર ધર્માંતરણ બાદ ઇસ્લામ અનુસાર ગંગાનું નામ આસિયા રાખી દેવામાં આવ્યું હતું. છોકરીના માતા-પિતા અને અન્ય કુટુંબીજનેનો ધર્માંતરણ બાદ લગ્નની માહિતી મળી અને તેઓ ઘટનાસ્થળે પહોંચ્યા ત્યાં સુધીમાં તેમના લગ્ન થઇ ગયા હતા.

ત્યાર બાદ ગંગાના પરિવારજનોએ જૈકબબાદ જઇને આ સંદર્ભમાં ફરિયાદ નોંધાવી છે. ફરિયાદમાં કરવામાં આવેલી નોંધણી અનુસાર આસિફ, તેનો ભાઇ, તેના પિતા અને અન્ય એક વ્યક્તિએ સાથે મળીને ગંગાનું અપહરણ કર્યું હતું. આ સંદર્ભમાં પોલીસે આસિફના ભાઇ, પિતા અને અન્ય એક વ્યક્તિની ધરપકડ કરી છે. જો કે આસિફ હજી સુધી પોલીસના હાથે ઝડપાયો નથી.

આ ઘટનાના વિરોધમાં પાકિસ્તાનનો હિન્દુ સમાજ રસ્તા પર ઉતરી આવ્યો છે. તેમણે જોરદાર વિરોધ પ્રદર્શન કર્યો છે. પાકિસ્તાનના હિન્દુઓમાં તેમની સામે થઇ રહેલા અત્યાચારોને કારણે ભારે ક્રોધ છે.

ઉલ્લેખનીય છે કે આવું પ્રથમવાર નથી બન્યું કે કોઇ હિન્દુ છોકરીનું અપહરણ કરી તેનો ધર્મ પરિવર્તન કરાવી જબરદસ્તી તેના લગ્ન મુસ્લિમ છોકરા સાથે કરાવવામાં આવ્યા હોય. પાકિસ્તાનમાં આ અગાઉ અનેક આવી ઘટનાઓ બની ચૂકી છે. આ પહેલા રિંકલ કુમારી નામની યુવતી સાથે પણ આવું જ કરવામાં આવ્યું હતું. ભારતમાંથી આરએસએસ અને ભાજપ આંતરરાષ્ટ્રીય સ્તરે પાકિસ્તાની હિન્દુઓના પ્રશ્નોને ઉઠાવવાની માંગ અવારનવાર કરતા આવ્યા છે.

English summary

Forcible conversion of Hindu girl in Pakistan, Hindu community descended to protest.