ભારતના કટ્ટર દુશ્મને પાઈલટ વગર ઉડતું હેલિકોપ્ટર બનાવ્યુ, જાણો તેની તમામ ખાસિયતો!

ભારતનો ચીન સાથે લાંબા સમયથી વિવાદ ચાલી રહ્યો છે. છેલ્લા બે-ત્રણ વર્ષમાં લદ્દાખમાં ચીની સેના સાથે અનેક અથડામણ થઈ છે. આ સિવાય થોડા દિવસો પહેલા ચીને તાઈવાન સામે મોરચો ખોલ્યો હતો. હવે સમાચાર આવી રહ્યા છે કે ભારત અને તાઈવાન સાથેના વિવાદ વચ્ચે ચીને એક એવું હેલિકોપ્ટર તૈયાર કર્યું છે જે પાઈલટ વિના ઉડાન ભરશે.

ઘણા દેશો વચ્ચે સ્પર્ધા ચાલી રહી છે

અત્યાર સુધી મોટાભાગના દેશો પાસે ડ્રોન એરક્રાફ્ટ છે, જે જાસૂસી સાથે હુમલો કરી શકે છે. આ માનવરહિત છે અને તે જમીન પર સ્થિત કંટ્રોલ સેન્ટરમાંથી ઓપરેટ થાય છે, પરંતુ હવે અમેરિકા, ચીન જેવા દેશો માનવરહિત હેલિકોપ્ટર બનાવવાની સ્પર્ધામાં છે. ઘણા અહેવાલોમાં એવો દાવો કરવામાં આવ્યો હતો કે ચીને માનવરહિત હેલિકોપ્ટરનું સફળ પરીક્ષણ કર્યું છે.

નૌસેનાના જહાજથી ઉડાન ભરશે

મીડિયા રિપોર્ટ્સ અનુસાર, ચીનના ડ્રોન હેલિકોપ્ટરને AR-500C નામ આપવામાં આવ્યું છે. ચીનના એક અનામી સૈન્ય સંશોધકે ટ્વિટર પર ચેતવણી આપી છે કે ચીને આ ભયાનક ટેક્નોલોજીનું સફળતાપૂર્વક પરીક્ષણ કર્યું છે. તાજેતરમાં જ તેણે સફળતાપૂર્વક તેની ફ્લાઇટ પણ પૂરી કરી હતી. તે ખાસ કરીને નૌકાદળના જહાજો પરથી ચલાવવા માટે બનાવવામાં આવ્યું છે.

કેટલી ઝડપે ઉડે છે?

હેલિકોપ્ટરના નિર્માતા AVIC દાવો કરે છે કે AR-500C એ સફળ ટેકઓફ અને લેન્ડિંગ તબક્કો પૂર્ણ કર્યો છે. તે સામાન્ય રીતે 5000 મીટરની ઊંચાઈએ ઉડી શકે છે, પરંતુ ઈમરજન્સી સ્થિતિમાં તે 6700 મીટરની ઊંચાઈએ ઉડી શકે છે, જ્યારે તેની મહત્તમ ઝડપ 170 કિમી પ્રતિ કલાક છે.

ટૂંક સમયમાં ફાઇટર વર્ઝન આવશે

ચીની અધિકારીઓ આ હેલિકોપ્ટરનો ઉપયોગ સર્વેલન્સ અને સર્ચ માટે કરવાની વાત કરી રહ્યા છે, પરંતુ એવી આશંકા છે કે ટૂંક સમયમાં તેનું ફાઈટર વર્ઝન પણ આવી જશે. આ સિવાય ઈલેક્ટ્રોનિક વર્ઝન પણ લાવવાની તૈયારી ચાલી રહી છે.

લેસર ગાઈડેટ મિસાઈલ હુમલા કરશે

અન્ય વિશેષતાઓની વાત કરીએ તો આ ડ્રોન હેલિકોપ્ટર સરળતાથી બોમ્બ લઈ જઈ શકે છે અને તેને તેના નિશાન પર છોડી શકે છે. આ સિવાય તે લેઝર ગાઈડેડ મિસાઈલ પણ ફાયર કરી શકે છે. એકવાર ટાંકી ભરાઈ જાય તો તે 5 કલાક માટે નોન-સ્ટોપ મુસાફરી કરી શકે છે. ચીન આ હેલિકોપ્ટર પર ઘણા સમયથી કામ કરી રહ્યું છે. લગભગ બે વર્ષ પહેલા ચીનના મીડિયાએ પણ તેની ઝલક દેખાડી હતી, જેનો વીડિયો હવે ફરીથી વાયરલ થઈ રહ્યો છે.

અમેરિકાએ પણ ટેસ્ટિંગ કર્યું છે

તમને જણાવી દઈએ કે આ વર્ષની શરૂઆતમાં અમેરિકાએ પોતાના સૌથી હાઈટેક હેલિકોપ્ટર બ્લેક હોકને પાઈલટ વગર ઉડાડ્યું હતું. આ ફ્લાઇટ સંપૂર્ણ સફળ રહી હતી. આ નવું પરાક્રમ યુએસ એરફોર્સની ડિફેન્સ એડવાન્સ્ડ રિસર્ચ પ્રોજેક્ટ્સ એજન્સીએ લોકહીડ માર્ટિનની પેટાકંપની સિકોર્સ્કીની મદદથી કર્યું છે. જેમાં UH-60A બ્લેક હોક હેલિકોપ્ટરને અલગ રીતે મોડિફાઇડ કરવામાં આવ્યું હતું.

English summary

India's arch-enemy has developed a helicopter that flies without a pilot