લંડન ઑલિમ્પિક પાર્ક જાહેર જનતા માટે ખુલ્લો મુકાયો

Published: Monday, June 3, 2013, 12:55 [IST]

લંડન, 3 જૂન : લંડનના મહત્વાકાંક્ષી ઓલિમ્પિક પાર્કને જાહેર જનતા અને પર્યટકો માટે ટૂંકી ટૂર માટે ખુલ્લો મૂકી દેવામાં આવ્યો છે. વર્ષ 2012માં ઓલિમ્પિક ગેમ્સની પૂર્ણાહુતિ થયા બાદ વ્યાપક રીનોવેશન હાથ ધરાયું હોવાથી આ પાર્કને બંધ રાખવામાં આવ્યો હતો. લંડનની હદમાં આવેલા આ વિશાળ પાર્કની કેવી રીતે કાયાપલટ કરવામાં આવી રહી છે તેની ઝલક જોવા માટે લોકોને અંદર એક ટ્રિપ કરવાની છૂટ આપવામાં આવી છે.

આ પાર્કની મુલાકાત લેવા માટે હજારોની સંખ્યામાં ટિકિટો એડવાન્સમાં વેચાઈ ગઈ છે. ટૂર-ટ્રાવેલ્સવાળાઓ આ પાર્ક માટે લગભગ એક કલાક જેટલા સમયની ટૂરનું આયોજન કરે છે.
વીકેન્ડ્સ અને સ્કૂલ હોલીડેના દિવસોમાં યોજાતી ‘પાર્ક ઈન પ્રોગ્રેસ' બસ ટ્રિપમાં આર્સેલરમિત્તલ ઓર્બિટ ટાવરની વિઝિટનો સમાવેશ કરાયો છે જેની ડિઝાઈન અનિશ કપૂરે તૈયાર કરી છે.

સમગ્ર પાર્કમાં નવેસરથી કેફે, કમ્યુનિટી સેન્ટરો, ગાર્ડન્સ બનાવવામાં આવી રહ્યા છે. ક્વીન એલિઝાબેથ ઓલિમ્પિક પાર્કને અડધો આવતા જુલાઈમાં ખુલ્લો મૂકવામાં આવશે અને આવતા વર્ષથી તેને આખો જ ખુલ્લો મૂકાશે. પ્લાનર્સને આશા છે કે આ નવા ડિસ્ટ્રીક્ટમાં આગામી 20 વર્ષમાં 8000 લોકો રહેતા થઈ જશે.