પાકિસ્તાનમાં આત્મઘાતી હુમલો, 9 લોકોના મોત, પોલીસ બસમાં કરાયો વિસ્ફોટ
પાકિસ્તાનના બલુચિસ્તાન પ્રાંતની રાજધાની ક્વેટાથી લગભગ 160 કિમી પૂર્વમાં આવેલા શહેર સિબ્બીમાં પોલીસકર્મીઓ પર આતંકવાદી હુમલો થયો હતો.
પાકિસ્તાનના બલુચિસ્તાન પ્રાંતમાં ફરી એકવાર પોલીસકર્મીઓ પર હુમલાના સમાચાર છે. આ હુમલો સોમવારે સિબી અને કચ્છ સરહદ નજીક બોલાન વિસ્તારમાં થયો હતો. આ હુમલામાં અત્યાર સુધીમાં કુલ 9 લોકોના મોત થયા છે. આ તમામ પોલીસકર્મીઓ જણાવવામાં આવી રહ્યા છે. પ્રાથમિક તપાસમાં આ આત્મઘાતી હુમલો હોવાનું સામે આવ્યું છે. આ સિવાય 13 અન્ય લોકો ઘાયલ થયાના સમાચાર છે.
બાઇકથી બસને મારી ટક્કર
પાકિસ્તાન પોલીસના પ્રવક્તા મહમૂદ ખાન નોતિઝાઈના જણાવ્યા અનુસાર, આ હુમલો બલૂચિસ્તાન પ્રાંતની રાજધાની ક્વેટાથી લગભગ 160 કિમી પૂર્વમાં સિબ્બી શહેરમાં થયો હતો. બલૂચિસ્તાન કોન્સ્ટેબલરી (BC) ના જવાનો સિબીના મેળામાં ફરજ પરથી પરત ફરી રહ્યા હતા ત્યારે એક આત્મઘાતી બોમ્બરે તેમની ટ્રક સાથે મોટરસાઇકલ અથડાવી, વિસ્ફોટમાં તેમનું મૃત્યુ થયું હતુ.
પોલીસે તપાસ શરૂ કરી
અહેવાલો અનુસાર ઘાયલોને સ્થાનિક હોસ્પિટલમાં દાખલ કરવામાં આવ્યા છે. ક્વેટા અને સિબીની હોસ્પિટલોમાં ઈમરજન્સી જાહેર કરવામાં આવી છે. જણાવવામાં આવી રહ્યું છે કે ઘણા ઘાયલોની હાલત ગંભીર છે અને મૃત્યુઆંક વધી શકે છે. પોલીસે ઘટનાની તપાસ શરૂ કરી છે. બોમ્બ ડિસ્પોઝલ સ્કવોડ અને સુરક્ષા દળો ઘટનાસ્થળે પહોંચી ગયા છે. 30 જાન્યુઆરીએ પાકિસ્તાનની એક મસ્જિદમાં આત્મઘાતી બોમ્બ વિસ્ફોટમાં 100થી વધુ પોલીસકર્મીઓ માર્યા ગયા હતા. હુમલાખોર પોલીસ યુનિફોર્મમાં મસ્જિદમાં ઘૂસ્યો હતો.
પોલીસ પર હુમલાઓ શરૂ થયા
આતંકવાદી સંગઠન તહરીક-એ-તાલિબાન સતત પોલીસને નિશાન બનાવી રહ્યું છે. તેની સક્રિયતા કેટલી વધી છે તેનો અંદાજ એ વાત પરથી લગાવી શકાય છે કે ફેબ્રુઆરીના 28 દિવસમાં આ સંગઠને પાકિસ્તાનમાં 29 આતંકી ઘટનાઓને અંજામ આપ્યો છે. આ ઘટનાઓમાં કુલ 57 લોકોના મોત થયા છે જ્યારે 157 લોકો ઘાયલ થયા છે. આ જાણકારી તહરીક-એ-તાલિબાન પોસ્ટર દ્વારા જ જાહેર કરવામાં આવી છે. તહરીક-એ-તાલિબાન પાકિસ્તાને પાકિસ્તાનને ચેતવણી આપી છે કે જ્યાં સુધી તે સંપૂર્ણ શરિયા કાયદો લાગુ નહીં કરે ત્યાં સુધી આવા હુમલા થતા રહેશે.
નાના સંગઠનોએ સાથે મળીને બનાવ્યુ TTP
તમને જણાવી દઈએ કે તહરીક-એ-તાલિબાન 13 નાના આતંકવાદી સંગઠનો સાથે મળીને બનાવવામાં આવ્યું હતું. અલ કાયદા સાથેના ગાઢ સંબંધોને કારણે તેને પાકિસ્તાન તાલિબાન તરીકે પણ ઓળખવામાં આવે છે. તેની સ્થાપના વર્ષ 2007માં પાકિસ્તાન આર્મીનો સામનો કરવા માટે કરવામાં આવી હતી. આ સંગઠનની સ્થાપનાનો શ્રેય આતંકવાદી સંગઠન બૈતુલ્લાહ મસૂદને જાય છે. એક અંદાજ મુજબ આ સંગઠનના 30 હજારથી વધુ લડવૈયા છે. આ સંગઠનનો ઉદ્દેશ્ય પાકિસ્તાનમાં શરિયા આધારિત કટ્ટરપંથી ઈસ્લામિક શાસન સ્થાપિત કરવાનો છે.
2011માં આતંકી સંગઠન જાહેર કરાયુ
મે 2010માં ન્યૂયોર્કના ટાઈમ્સ સ્ક્વેર પર થયેલા હુમલામાં પહેલીવાર ટીટીપીનું નામ સામે આવ્યું હતું. આ પછી, તેની આતંકવાદી પ્રવૃત્તિઓ માટે વર્ષ 2010 માં તેને વિદેશી આતંકવાદી સંગઠન જાહેર કરવામાં આવ્યું હતું. આ પછી તે ચર્ચામાં આવી જ્યારે આ સંગઠન સાથે જોડાયેલા આતંકવાદીઓએ 16 ડિસેમ્બર 2014ના રોજ પાકિસ્તાનના પેશાવરમાં આર્મી સ્કૂલ પર હુમલો કર્યો અને 200 બાળકોને મારી નાખ્યા. અફઘાનિસ્તાનમાં તાલિબાન શાસન પુનઃસ્થાપિત થયા બાદથી આતંકવાદી હુમલાઓમાં ભારે વધારો થયો છે.
Click it and Unblock the Notifications
Sign in with Google
