Cricket in olympics : ઓલિમ્પિકમાં ક્રિકેટનો સમાવેશ કરાયો, માત્ર આટલી ટીમોને મળશે એન્ટ્રી

Cricket in Olympics : લાંબા સમયથી ચાલી રહેલી ચર્ચા અને પ્રક્રિયા પછી આખરે ક્રિકેટ ફેન્સ માટે એક સારા સમાચાર સામે આવ્યા છે.

હવે ક્રિકેટને ઓલમ્પિક રમતોમાં સ્થાન મળ્યું છે. ICC ની સતત મહેનત અને પ્રયત્નો આખરે સફળ થયા છે અને વર્ષ 2028ના લોસ એન્જેલિસ ઓલમ્પિકમાં ક્રિકેટને સત્તાવાર રીતે સામેલ કરી લેવાઈ છે.

ક્રિકેટ પહેલાં એક વાર માત્ર 1900ના ઓલમ્પિકમાં રમાઈ હતી, જેમાં ગ્રેટ બ્રિટન અને ફ્રાન્સ વચ્ચે માત્ર એક જ મેચ હતી. ગ્રેટ બ્રિટને તે મેચ જીતીને ગોલ્ડ મેડલ જીત્યો હતો.

આ પછી ક્રિકેટ માટે ઓલમ્પિકના દરવાજા બંધ થઈ ગયા હતા. જો કે હવે ફરી 128 વર્ષ પછી તે ખુલ્યા છે અને આ વખતે પુરુષો તથા મહિલાઓ બંને વર્ગમાં ક્રિકેટને સામેલ કરાઈ છે.

9 એપ્રિલે આંતરરાષ્ટ્રીય ઓલમ્પિક સમિતિ (IOC) દ્વારા જાહેરાત કરવામાં આવી છે કે પુરુષો અને મહિલાઓ બંને કેટેગરી માટે 90-90 ખેલાડીઓનો ક્વોટો ફાળવવામાં આવ્યો છે. દરેક ટીમમાં 15 ખેલાડી હોઈ શકે છે એટલે કુલ 6-6 ટીમોને પ્રવેશ મળશે.

ક્રિકેટ મેચો ક્યાં યોજાશે એની વાત કરીએ તો હજુ સુધી કોઈ સત્તાવાર પુષ્ટિ નથી થઈ. જો કે, એવું માનવામાં આવે છે કે ન્યૂયોર્ક આ માટે તૈયાર છે, જ્યાં છેલ્લા વર્ષે ટી-20 વર્લ્ડ કપના મેચો યોજાયા હતા.

ઓલમ્પિકમાં આવવા પહેલાં ક્રિકેટે અલગ અલગ આંતરરાષ્ટ્રીય મંચ પર પોતાનું સ્થાન બનાવ્યું છે. તાજેતરમાં એશિયન ગેમ્સમાં ક્રિકેટનો સમાવેશ થયો હતો અને બર્મિંગહામ કોમનવેલ્થ ગેમ્સમાં મહિલાઓની ક્રિકેટ ઇવેન્ટ પણ યોજાઈ હતી.

ઓલમ્પિકમાં ક્રિકેટનો સમાવેશ માત્ર રમતમાં વધારો નહિ, પણ ગૌરવ અને ગોલ્ડ મેડલની શક્યતા પણ છે. હવે ક્રિકેટ પ્રેમીઓ તેમના મનપસંદ ખેલાડીઓને ઓલમ્પિકમાં જોવા માટે આતુર રહેશે.

English summary

Cricket in Olympics 2028: Official Entry Confirmed for Only 6 Teams