ICC વર્લ્ડકપના શેડ્યુલમાં થયો બદલાવ, જાણો ભારત-પાકિસ્તાન મેચની નવી તારીખ

Published: Wednesday, August 9, 2023, 22:35 [IST]

ભારતમાં આ વર્ષે ઓક્ટોબરમાં યોજાનાર ODI વર્લ્ડ કપ માટે કેટલીક મેચોના શેડ્યૂલ બદલવાની વાત થઈ હતી અને હવે કંઈક આવું જ જોવા મળ્યું છે. ICCએ નવા કાર્યક્રમની જાહેરાત કરી છે. આમાં, 9 મેચોના શેડ્યૂલને બદલવામાં આવ્યું છે.

ભારત અને પાકિસ્તાન વચ્ચે 15 ઓક્ટોબરે અમદાવાદમાં રમાનાર મેચ હવે 14 ઓક્ટોબરે રમાશે. આ સિવાય પાકિસ્તાનની બીજી મેચ ફરીથી શેડ્યૂલ કરવામાં આવી છે. અફઘાનિસ્તાન અને ઈંગ્લેન્ડ વચ્ચે 14 ઓક્ટોબરે રમાનારી મેચને હવે 15 ઓક્ટોબરે શિફ્ટ કરી દેવામાં આવી છે.

હૈદરાબાદમાં શ્રીલંકા અને પાકિસ્તાન વચ્ચેની મેચ 12 ઓક્ટોબરે યોજાવાની હતી, તેને હવે 10 ઓક્ટોબરે શિફ્ટ કરી દેવામાં આવી છે. ઓસ્ટ્રેલિયા અને દક્ષિણ આફ્રિકા વચ્ચે 13 ઓક્ટોબરે લખનૌમાં રમાનાર મેચ હવે 12 ઓક્ટોબરે રમાશે.

ચેન્નાઈમાં બાંગ્લાદેશ અને ન્યુઝીલેન્ડ વચ્ચે 14 ઓક્ટોબરે મેચ થવાની હતી, હવે મેચ 13 ઓક્ટોબરે રમાશે. શરૂઆતમાં ધર્મશાલામાં ઈંગ્લેન્ડ અને બાંગ્લાદેશ વચ્ચે ડે-નાઈટ મેચ થવાની હતી પરંતુ હવે તે દિવસ દરમિયાન રમાશે. ભારતીય સમય અનુસાર મેચ સવારે 10.30 કલાકે રમાશે.

ટુર્નામેન્ટના અંતિમ તબક્કામાં 12 નવેમ્બરની ડબલ હેડર મેચ 11 નવેમ્બરે યોજાશે. પુણે ઓસ્ટ્રેલિયા અને બાંગ્લાદેશ વચ્ચેની મેચની યજમાની કરશે જ્યારે કોલકાતા પાકિસ્તાન અને ઈંગ્લેન્ડ વચ્ચેની મેચની યજમાની કરશે. નેધરલેન્ડ સામેની ભારતની ફાઈનલ મેચ હવે 11મીને બદલે 12મી નવેમ્બરે બેંગલુરુમાં ડે-નાઈટ તરીકે રમાશે. ફાઈનલ 19 નવેમ્બરે જ રાખવામાં આવી છે.