IND vs PAK, T20 World Cup: ભારતે પાકિસ્તાનને જીત માટે આપ્યો 176 રનનો ટાર્ગેટ
IND vs PAK, T20 World Cup 2026: T20 વર્લ્ડ કપ 2026ના સૌથી હાઈ-વોલ્ટેજ મુકાબલામાં ભારતીય ટીમે પાકિસ્તાન સામે રનનો પહાડ ખડકી દીધો છે. આર. પ્રેમદાસા સ્ટેડિયમ ખાતે રમાઈ રહેલી આ 27મી મેચમાં ભારતે પ્રથમ બેટિંગ કરતા 20 ઓવરમાં 7 વિકેટે 175 રન બનાવ્યા છે. T20 વર્લ્ડ કપના ઈતિહાસમાં પાકિસ્તાન વિરુદ્ધ ભારતનો આ અત્યાર સુધીનો સૌથી મોટો સ્કોર છે.
ઈશાન કિશનની વિસ્ફોટક બેટિંગ
ભારતની આ મજબૂત સ્થિતિ પાછળ ડાબોડી બેટ્સમેન ઈશાન કિશનનો મોટો હાથ રહ્યો છે. ઈશાને પાકિસ્તાની બોલરોની લાઇન-લેન્થ બગાડતા માત્ર 40 બોલમાં 77 રનની આક્રમક ઇનિંગ રમી હતી. પોતાની ઇનિંગ દરમિયાન તેણે 10 ચોગ્ગા અને 3 ગગનચુંબી છગ્ગા ફટકારીને સ્ટેડિયમમાં હાજર ફેન્સને ઝૂમવા પર મજબૂર કરી દીધા હતા.
પ્લેઈંગ-11માં મોટા ફેરફાર
આજની મહત્વની મેચ માટે ભારતીય ટીમે પોતાની રણનીતિમાં ફેરફાર કરતા બે મહત્વના ફેરફાર કર્યા હતા:
- ઈન: કુલદીપ યાદવ અને અભિષેકની ટીમમાં વાપસી થઈ છે.
- આઉટ: અર્શદીપ સિંહ અને સંજૂ સેમસનને આ મેચમાં આરામ આપવામાં આવ્યો છે.
પાકિસ્તાનની અનોખી રણનીતિ: 20માંથી 18 ઓવર સ્પિન
કોલંબોની પિચના મિજાજને સમજીને પાકિસ્તાની કેપ્ટને અનોખો પ્રયોગ કર્યો હતો. આખી ઇનિંગમાં માત્ર 2 ઓવર ફાસ્ટ બોલર શાહીન આફ્રિદીએ નાખી હતી, જ્યારે બાકીની 18 ઓવર સ્પિનરો પાસે નખાવવામાં આવી હતી. પાકિસ્તાન તરફથી સૈમ અયુબ સૌથી સફળ બોલર રહ્યો હતો, તેણે 3 મહત્વની વિકેટ ઝડપી હતી.
રેકોર્ડ બ્રેક સ્કોર
ભારતે બનાવેલા 175 રન એ પાકિસ્તાન સામે T20 વર્લ્ડ કપના મંચ પર ભારતનો સર્વોચ્ચ સ્કોર છે. હવે જોવાનું એ રહેશે કે ભારતીય બોલરો આ લક્ષ્યનો બચાવ કરીને પાકિસ્તાનને પરાજય આપી શકે છે કે કેમ.
Click it and Unblock the Notifications
Sign in with Google
