આ રીતે નંખાયો સચિનને ગોડ ઓફ ક્રિકેટ બનાવવાનો પાયો

By Rakesh

Updated: Wednesday, August 14, 2013, 9:20 [IST]

ક્રિકેટના ભગવાન, માસ્ટર બ્લાસ્ટર, ધ રેકોર્ડ મેન અનેક નામોથી વિશ્વ ક્રિકેટમાં જાણીતા બનેલા સચિન તેંડુલકરે વિશ્વ ક્રિકેટમાં 100 જેટલી સદીઓ ફટકારેલી છે. ક્રિકેટના મોટાભાગના રેકોર્ડ પછીએ સૌથી વધુ રન બનાવવાનો રેકોર્ડ હોય, સદી ફટકારવાનો રેકોર્ડ હોય કે પછી અન્ય રેકોર્ડ હોય, તેમાં આપણે એક આંતરરાષ્ટ્રીય ખેલાડીનું નામ અચુક પણે વાંચવા મળતું હોય છે અને એ નામ બીજા કોઇનું નહીં પરંતુ એ નામ હતું સચિન તેંડુલકર. આજે અચાનક સચિન તેંડુલકર અંગે આ પ્રકારના લેખને લઇને ચોક્કસપણે તમારા મનમાં એક પ્રશ્ન ઉઠતો હશે, પરંતુ તમારાએ પ્રશ્ન અને ઉત્સુકતાભરી સ્થિતિને અહીં જ સમાવી દો.

આજે એટલે 14 ઑગસ્ટનો દિવસ સચિન તેંડુલકરના જીવન માટે ઘણો જ ખાસ છે. એ કહેવું કદાચ અતિશયોક્તિભર્યું પણ હોઇ શકે છે કે, જો આ દિવસ સચિનના જીવનમાં ના આવ્યો હોત તો કદાચ બની શકત કે તે ક્રિકેટનો ગોડ બની શક્યો ના હોત, આજથી 23 વર્ષ પહેલા એટલે કે 14 ઑગસ્ટ 1990ના રોજ સચિન તેંડુલકર માન્ચેસ્ટરના ઓલ્ડ ટ્રાફોર્ડ ખાતે પોતાની કારકિર્દીની બીજી ટેસ્ટ રમવા માટે ગયો હતો. આ ટેસ્ટ ભારત અને ઇંગ્લેન્ડ વચ્ચે હતી. પહેલી ટેસ્ટ ભારત માટે ફળદાયી રહી નહોતી અને ટીમ ઇન્ડિયાએ હારનો સ્વાદ ચાખવો પડ્યો હતો.

હારના ભારણમાંથી બહાર આવીને ટીમ ઇન્ડિયા માન્ચેસ્ટરના ઓલ્ડ ટ્રાફોર્ડ મેદાન પર ઉતરી હતી, પરંતુ ઇંગ્લેન્ડની ટીમ આજે પણ ભારતને પરાસ્ત કરવાના મૂડમાં હોય તેમ ટીમ ઇન્ડિયાના બોલર્સ પર તૂટી પડી હતી. ઇંગ્લેન્ડે પ્રથમ બેટિંગ કરતા ભારતે સામે 519 રનનો લક્ષ્યાંક મુક્યો હતો. જેના જવાબમાં ભારતની ટીમ પહેલી ઇનિંગમાં 432 રન કરી શકી હતી. પહેલી ઇનિંગમાં અઝહરુદ્દિને સદી તો ફટકારી જ હતી પરંતુ ટીમ ઇન્ડિયાના ઉભરતા ખેલાડી અને ક્રિકેટના ભગવાને પણ દર્શાવી દીધું હતું કે ક્રિકેટનો નવો ઉદય થવાની તૈયારીમાં છે, સચિને પહેલી ઇનિંગમાં 68 રન બનાવ્યા.

બીજી ઇનિંગમાં પણ ઇંગ્લેન્ડે ભારત સામે 320 બનાવ્યા અને ભારત સામે 408 રનનો લક્ષ્યાંક મુક્યો. જો કે, બીજી ઇનિંગ ભારત માટે સારી સાબિત ના થઇ અને માત્ર 127 રનમાં ભારતની પાચ વિકેટ પડી ગઇ હતી. બસ એ જ સમયે મેદાન પર એક એવો તરૂણ ક્રિકેટર ઉતર્યો કે, જેને જોઇને વિરોધી ટીમ ઇંગ્લેન્ડે ક્યારેય વિચાર્યું નહીં હોય કે આ ટેણિયો વિજયને હાથમાંથી લઇને જતો રહેશે. 17 વર્ષ ત્રણ મહિના અને 21 દિવસની ઉમર અને ઓછી ઉંચાઇ સાથે સચિન તેંડુલકર મેદાન પર ઉતર્યો અને પોતાની અંદર રહેલી ક્રિકેટ કૌશલ્યતાનો પરચો આપતો હોય તેમ 119 રનની ઇનિંગ રમી. કહેવાય છે કે આ ઇનિંગ સચિન માટે તેની કારકિર્દીના ઘડતર સમાન સાબીત થઇ હતી.

બસ આ ઇનિંગથી સચિનના ગોડ ઓફ ક્રિકેટનો પાયો નંખાયો. આ તેની કિક્રેટ કારકિર્દીની પ્રથમ ટેસ્ટ સદી હતી. ત્યારબાદ સચિને ક્યારેય પાછળ વળીને જોયું નથી. ક્રિકેટ કારકિર્દીમાં અનેક સંઘર્ષ ભર્યા દિવસો આવ્યા હોવા છતાં પણ સચિને ક્રિકેટમાં પોતાનું અને દેશનું ગૌરવ વધાર્યું છે. આ તકે અમે અહીં સચિનની કેટલીક યાદગાર સદીઓ અંગે તસવીરો થકી જણાવી રહ્યાં છીએ.