IPL 2022 : CSK ને 156 રનનો ટાર્ગેટ, મુંબઈની છેલ્લી 5 ઓવરમાં ઈજ્જત બચી!
IPL 2022માં મુંબઈએ ચેન્નઈ સામે જીતવા માટે 156 રનનો લક્ષ્યાંક રાખ્યો છે. ટોસ હાર્યા બાદ પ્રથમ બેટિંગ કરતા મુંબઈ ઈન્ડિયન્સના ટોપ ઓર્ડર બેટ્સમેનોએ નિરાશ કર્યા હતા.
IPL 2022માં મુંબઈએ ચેન્નઈ સામે જીતવા માટે 156 રનનો લક્ષ્યાંક રાખ્યો છે. ટોસ હાર્યા બાદ પ્રથમ બેટિંગ કરતા મુંબઈ ઈન્ડિયન્સના ટોપ ઓર્ડર બેટ્સમેનોએ નિરાશ કર્યા હતા. જોકે ટીમે 20 ઓવરમાં 7 વિકેટ ગુમાવીને 155 રનનો સન્માનજનક સ્કોર બનાવ્યો હતો. તિલક વર્માએ સૌથી વધુ અણનમ 51 રનની ઇનિંગ રમી હતી.
19 વર્ષીય યુવા ખેલાડી તિલક વર્માએ મુશ્કેલ પરિસ્થિતિઓમાં શાનદાર બેટિંગ કરતા 42 બોલમાં પોતાની ફિફ્ટી પૂરી કરી હતી. તે 43 બોલમાં 51 રન બનાવીને અણનમ પરત ફર્યો હતો. તિલક અને જયદેવ ઉનડકટે 8મી વિકેટ માટે શાનદાર બેટિંગ કરી અને માત્ર 16 બોલમાં 35 રન જોડ્યા. ઉનડકટ 9 બોલમાં 19 રન બનાવીને અણનમ રહ્યો હતો.
47ના સ્કોર પર પ્રથમ 4 વિકેટ ગુમાવ્યા બાદ મુંબઈની ઈનિંગ્સ મુશ્કેલીમાં મુકાઈ ગઈ હતી. આ સ્થિતિમાં તિલક વર્મા અને રિતિક શોકીને ન માત્ર ઇનિંગ્સને સંભાળી પરંતુ 5મી વિકેટ માટે 36 બોલમાં 38 રન પણ જોડ્યા. બંનેની જોડીએ મુંબઈ કેમ્પમાં આશા જગાવી હતી, પરંતુ ડ્વેન બ્રાવોએ શોકીન (25)ને આઉટ કરીને CSK માટે 5મી સફળતા મેળવી હતી. હૃતિકનો કેચ મિડ-ઓફમાં ઉથપ્પાએ પકડ્યો હતો.
શરૂઆતના આંચકાઓ બાદ મુંબઈની ઈનિંગ્સની સમગ્ર જવાબદારી સૂર્યકુમાર યાદવના ખભા પર આવી ગઈ હતી. તેણે પડતી વિકેટો વચ્ચે કેટલાક સારા શોટ પણ લગાવ્યા, પરંતુ ખરાબ શોટ રમીને તેણે પોતાની વિકેટ ગુમાવી દીધી. સૂર્યા 32 રને મિશેલ સેન્ટનરના હાથે આઉટ થયો હતો. ડીપ બેકવર્ડ સ્ક્વેર લેગ પર મુકેશ ચૌધરીએ તેનો કેચ પકડ્યો હતો. તેણે પોતાની ઇનિંગમાં 3 ફોર અને 1 સિક્સર ફટકારી હતી.