Paris Olympics 2024: ધાકડ ગર્લ વિનેશ ફોગાટ ફાઈનલમાં, ઐતિહાસિક પહેલા ગોલ્ડની નજીક ભારત

Paris Olympics 2024 Wrestler Vinesh Phogat: ભારતીય કુસ્તીબાજ વિનેશ ફોગાટે પેરિસ ઓલિમ્પિક 2024માં મહિલાઓની 50 કિગ્રા વજન વર્ગમાં ક્યુબાની યુસ્નેલિસ ગુઝમેન લોપેઝ સામે સેમિફાઇનલ મેચ જીતી લીધી છે. વિનેશે સતત પોઈન્ટ લઈને 5-0ની લીડ મેળવી હતી. મેચના અંતે સ્કોર સરખો રહ્યો અને વિનેશે ફાઇનલમાં પ્રવેશ કર્યો.

આ જીત સાથે વિનેશ ફોગાટનો મેડલ નિશ્ચિત થઈ ગયો છે. હવે તે ગોલ્ડ મેડલ જીતવાનો પ્રયાસ કરશે. વિનેશ ફોગાટે 2024 પેરિસ ઓલિમ્પિકની શાનદાર શરૂઆત કરી હતી. વિનેશ ફોગાટે સૌપ્રથમ પ્રી-ક્વાર્ટર મેચમાં 2020 ટોક્યો ઓલિમ્પિક્સના સુવર્ણ ચંદ્રક વિજેતા અને ચાર વખતની વિશ્વ ચેમ્પિયન જાપાનની યુઇ સુસાકીને 3-2થી હરાવી હતી.

આ પછી વિનેશ ફોગાટે ક્વાર્ટર ફાઇનલમાં યુક્રેનની ઓક્સાના લિવાચને હરાવી હતી. તેણે મેચ 7-5થી જીતી લીધી હતી. હરિયાણાના બલાલી ગામમાં 25 ઓગસ્ટ 1994ના રોજ જન્મેલી વિનેશ કુસ્તીબાજોના પરિવારમાંથી આવે છે. તેના કાકા મહાવીર સિંહ ફોગાટે તેને કુસ્તીની તાલીમ આપી હતી.

વિનેશ ફોગાટને પણ સમાજની ટીકાઓનો સામનો કરવો પડ્યો હતો તેમ છતાં, તેણે પોતાનો મક્કમ નિર્ધાર જાળવી રાખ્યો અને ભારતની ટોચની મહિલા કુસ્તીબાજોમાંની એક બની. વિનેશ ફોગાટ નવ વર્ષની હતી ત્યારે તેના પિતા રાજપાલ ફોગાટની હત્યા કરવામાં આવી હતી. આમ છતાં, તે કુસ્તીમાં તેની કારકિર્દી પર ધ્યાન કેન્દ્રિત કરતી હતી.

ગ્રામજનોના વિરોધ છતાં, વિનેશ પોતાના નિર્ણય પર અડગ રહી અને ભારતીય કુસ્તીમાં ઘણી સિદ્ધિઓ હાંસલ કરી. વિનેશે રિયો 2016માં મહિલાઓની 48 કિગ્રા ફ્રી સ્ટાઇલ કેટેગરીમાં ઓલિમ્પિક ડેબ્યૂ કર્યું હતું, પરંતુ ઘૂંટણની ઈજાને કારણે તેને ખસી જવું પડ્યું હતું.

તે ટોક્યો 2020 માટે પણ ક્વોલિફાય થઈ હતી પરંતુ ક્વાર્ટર ફાઇનલમાં હારી ગઈ હતી. વિનેશ પાસે મેડલ અને રેકોર્ડની પ્રભાવશાળી યાદી છે. કોમનવેલ્થ ગેમ્સ અને એશિયન ગેમ્સ બંનેમાં ગોલ્ડ જીતનારી તે પ્રથમ ભારતીય મહિલા કુસ્તીબાજ છે.