ટી-20 વર્લ્ડકપ: કાંગારૂઓને પછાડી કેરેબિયન પહોંચ્યા ફાઇનલમાં
આર યા પારના મુકાબલામાં કાંગારૂઓ પર કેરેબિયન દરેક રીતે ભારે પડ્યા. ક્રિસ ગેઇલની તોફાની બેટિંગ દ્વારા વેસ્ટઇન્ડિઝે ઓસ્ટ્રેલિયાને જીતવા માટે 206 રનનો ઝંગી સ્કોર આપ્યો હતો. જેનો પીછો કરતા ઓસ્ટ્રેલિયાની આખી ટીમ 16.4 ઓવરમાં જ માત્ર 131 રન પર જ ઓલ આઉટ થઇ ગઇ હતી.
કાંગારૂઓમાં માત્ર કપ્તાન જયોર્જ બેલેએ શાનદાર 63 રનની પારી રમી હતી જોકે ઓસીનો અન્ય કોઇ ખેલાડી ક્રિઝ પર ટકી શક્યો નહીં. વેસ્ટઇન્ડીઝ તરફથી રવિ રામ પાલે ત્રણ વિકેટ ઝડપી હતી, જ્યારે બદ્રી, સુનીલ નરેન અને કેરોન પોલાર્ડે 2-2 વિકેટ ઝડપી હતી.
આ પહેલા વેસ્ટઇન્ડિઝે ટોસ જીતીને પ્રથમ બેટિંગ કરવાનો નિર્ણય કરી 20 ઓવરમાં ચાર વિકેટ પર 205 રન બનાવ્યા. જેમાં ક્રિસ ગેઇલે 41 બોલમાં 75 રન ફટકારી દીધા. ઓસીનો કોઇ બોલર કેરેબિયનોને રોકી શક્યો નહીં, અને કેરેબિયને ઝંગી સ્કોર બનાવી દીધો. ઓસી તરફથી કુમીન્સને 2 અને સ્ટાર્ક અને ડોર્થીએ 1-1 વિકેટ ઝડપી હતી.