આજથી મોંઘી બનશે રેલવે મુસાફરી, નવા દર લાગૂ
રેલભાડામાં ભારેખમ ધરખમ વધારો કરતાં સ્લીપરથી માંડીને એસી ક્લાસના ભાડા વધારી દેવામાં આવ્યાં છે. સરકારે આ નિર્ણય નવ જાન્યુઆરીના રોજ લીધો હતો, જેને આજથી લાગૂ કરવામાં આવશે.
રેલ બજેટ 2013 રજૂ થવાને લગભગ હજુ દોઢ મહિના જેટલો સમય બાકી છે. બજેટ પહેલાં કેન્દ્રિય રેલમંત્રી પવન બંસલે રેલવેના ભાડામાં વધારો કર્યો છે. રેલભાડાના વધારાની સૌથી વધુ અસર દરરોજ અપડાઉન કરનાર મુસાફરો પર વર્તાશે. હવે ઓછામાં ઓછું ભાડું 3 રૂપિયાના બદલે 5 રૂપિયા થશે જે સ્ટેશનોનું ભાડુ 6-7 રૂપિયા છે તેને વધારીને રાઉન્ડ ફિગર 10 રૂપિયા કરી દિધું છે.
રેલ મુસાફરો પર વધુ એક બોજ નાખવામાં આવ્યો છે. સુપરફાસ્ટ ચાર્જ પણ 8-9 રૂપિયાની જગ્યાએ રાઉન્ડ ફિગર 10 રૂપિયા કરવામાં આવ્યો છે. અત્રે ઉલ્લેખનીય છે કે એમએસટી ધારકોને 8 રૂપિયા અને સામાન્ય ટિકિટ ધારકોને 9 રૂપિયા સુપરફાસ્ટ ચાર્જ આપવો પડશે, પરંતુ હવે 22 જાન્યુઆરીથી મુસાફરોને વધેલ સુપરફાસ્ટ ચાર્જ ચૂકવવો પડશે.