જીઓજીમાં અનુપમે ધર્યો વધુ એક વિચિત્ર અવતાર
મુંબઈ, 29 મે : બૉલીવુડના પીઢ અભિનેતા અનુપમ ખેર વિલન, કૉમેડિયન સહિત ધીર-ગંભીર ભૂમિકાઓ માટે જાણીતાં છે. તેમણે પોતાના અત્યાર સુધીના કૅરિયરમાં અનેક ફિલ્મોમાં વિવિધ પ્રકારના રોલ કર્યા છે, તો વિલન તરીકે તેમણે અનેક વાર વિચિત્ર અવતારો પણ ધર્યાં છે.
સારાંશમાં ગંભીર ભૂમિકા ભજવનાર અનુપમ ખેર કર્મા ફિલ્મ દ્વારા ડૉ. ડૅંગ તરીકે જાણીતા થયાં. તેમણે અનેક ફિલ્મોમાં આવા વિચિત્ર લુક ધારણ કર્યા છે. આ જ ક્રમે હવે તેઓ ગૅંગ ઑફ ઘોસ્ટ્સ ફિલ્મમાં વધુ એક વાર વિચિત્ર અવતાર સાથે લોકોની સામે આવશે.
સતીશ કૌશિક દિગ્દર્શિત ગૅંગ ઑફ ઘોસ્ટ્સ એટલે કે જીઓજી ફિલ્મમાં અનુપમ ખેરનો ફર્સ્ટ લુક તાજેતરમાં જ લૉન્ચ થયો છે. આ બૉલીવુડ ફિલ્મ બંગાળી ફિલ્મ ભૂતેર ભબિષ્યતની હિન્દી રીમેક છે. નિર્માતા રતન જૈને 2012માં આવેલી આ બંગાળી ફિલ્મના રાઇટ્સ હિન્દી રીમેક બનાવવા માટે ખરીદ્યાં છે. અનુપમ ખેર આ ફિલ્મ અંગે અગાઉ કહી જ ચુક્યા છે કે ફિલ્મની સ્ક્રિપ્ટ ડિફરેંટ પ્રકારની છે. ફિલ્મમાં માહી ગિલ અને મીરા ચોપરા પણ છે.