એસએસટીજીમાં સન્ની કરશે અસામાન્ય અને અદ્ભુત એક્શન!
મુંબઈ, 5 જુલાઈ : ફિલ્મ નિર્માતા અનિલ શર્માનું કહેવું છે કે તેઓ સન્ની દેઓલ સાથે સિંહ સાહબ ધ ગ્રેટ એટલે કે એસએસટીજી ફિલ્મના છેલ્લા એક્શન દૃશ્યના શૂટિંગ માટે બિલ્કુલ તૈયાર છે.
અનિલે એક વાતચીતમાં જણાવ્યું - સન્નીનું એક્શન દૃશ્ય શૂટ કરવાનું બાકી રહ્યું છે. તેના છેલ્લા તબક્કાનું શૂટિંગ મુંબઈ ખાતે થશે કે જે 22મી જુલાઈ સુધી પૂર્ણ થઈ જશે. આ સન્નીનું અસામાન્ય અને અદ્ભુત એક્શન દૃશ્ય હશે. તેમણે જણાવ્યું કે સિંહ સાહબ ધ ગ્રેટ બહુ જ સારી બની છે અને અમે તેને દશેરાના દિવસે રિલીઝ કરીશું.
અનિલ શર્મા લાંબી ફિલ્મો બનાવવા માટે જાણીતા છે અને તેમનું કહેવું છે કે મોટાભાગની સફળ ફિલ્મો લાંબી જ હોય છે. તેમણે જણાવ્યું - જો કોઈ ફિલ્મ દર્શકોને ત્રણ કલાક જકડી રાખી શકે, ત્યારે જ તે સફળ થાય છે. જો આપ ઇતિહાસમાં જોશો, તો મુઘલ-એ-આઝમ અને દિલવાલે દુલ્હનિયા લે જાયેંગે સહિત તમામ લાંબી ફિલ્મો સફળ સાબિત થઈ છે. સિંહ સાહબ ધ ગ્રેટ ફિલ્મના નાયિકા ઉર્વશી રાઉતેલા છે.
સન્ની દેઓલ તાજેતરમાં જ યમલા પગલા દીવાના 2 ફિલ્મમાં ધર્મેન્દ્ર તથા બૉબી દેઓલ સાથે દેખાયા હતાં. તેમની આગામી ફિલ્મોમાં આઈ લવ એનવાય તથા મોહલ્લા અસ્સીનો પણ સમાવેશ થાય છે.