ગુજરાતને જલ્દી મળી શકે છે પ્રથમ અમૃત ભારત એક્સપ્રેસ ટ્રેન

Amrut Bharat Express : ગુજરાતના લાખો મુસાફરો માટે સારા સમાચાર છે. ભારતીય રેલવે દ્વારા ગુજરાતને તેની પ્રથમ અમૃત ભારત એક્સપ્રેસ ટ્રેન મળવા જઈ રહી છે.

આ સુપરફાસ્ટ ટ્રેન સેવા દિવાળી પહેલા શરૂ થવાની શક્યતા છે. રેલવેના અધિકારીઓ દ્વારા મળેલી માહિતી મુજબ, સુરતના ઉધના રેલવે સ્ટેશનથી આ નોન-એસી સ્લીપર અમૃત ભારત એક્સપ્રેસ ટ્રેન શરૂ કરવાનું આયોજન ચાલી રહ્યું છે.

આ ટ્રેન ખાસ કરીને સામાન્ય મુસાફરોની સુવિધા માટે તૈયાર કરવામાં આવી છે, જેમાં સ્લીપર કોચમાં પણ આધુનિક સુવિધાઓ ઉપલબ્ધ હશે.

રેલવે બોર્ડ હાલમાં ટ્રેનના સમયપત્રક અને રૂટને અંતિમ સ્વરૂપ આપી રહ્યું છે અને ટૂંક સમયમાં જ તેના પ્રારંભિક બિંદુ અને રૂટ વિશે નિર્ણય લેવામાં આવશે.

અમૃત ભારત એક્સપ્રેસ એ ભારતીય રેલવેની એક નવી પહેલ છે જે મુસાફરોને શાનદાર મુસાફરીનો અનુભવ પ્રદાન કરશે.

આ ટ્રેન 160 થી 180 કિલોમીટર પ્રતિ કલાકની મહત્તમ ઝડપે દોડી શકે છે. ટ્રેનમાં કુલ 22 કોચ હશે, જેમાં બે પાર્સલ કોચનો સમાવેશ થાય છે. અદ્યતન બ્રેકિંગ સિસ્ટમ અને અન્ય સુરક્ષા સુવિધાઓથી સજ્જ આ ટ્રેનમાં નોન-એસી સ્લીપર કોચમાં પણ મુસાફરો માટે આધુનિક લાઇટિંગ અને અન્ય સુવિધાઓ ઉપલબ્ધ હશે.

હાલમાં બે અમૃત ભારત ટ્રેનો કાર્યરત છે અને ટૂંક સમયમાં ગંજામથી સુરતને જોડતી વધુ એક ટ્રેન શરૂ થવાની છે. આ નિર્ણયથી સુરતમાં રહેતા ઓડિશાના પ્રવાસી શ્રમિકો અને મુસાફરોમાં ખુશી છે.

English summary

Gujarat to Get Its First Amrit Bharat Express Soon