અમેરિકાના ન્યુ જર્સી પાસે પ્લાન્ટ શરૂ કરશે અમૂલ

Updated: Thursday, June 6, 2013, 16:28 [IST]

આણંદ, 6 જૂન : 'ટેસ્ટ ઓફ ઇન્ડિયા' તરીકે ઓળખાતી દેશની અગ્રણી ડેરી પ્રોડક્ટ બ્રાન્ડ 'અમૂલ' હવે આવનારા સમયમાં 'ટેસ્ટ ઓફ અમેરિકા' બને તો નવાઇ ના પામશો. કારણ કે અમૂલ પોતાની વિસ્તરણ યોજના હેઠળ અમેરિકાના ન્યુ જર્સી પાસે એક ડેરી પ્લાન્ટ સ્થાપવાનું આયોજન ધરાવે છે. આ પ્લાન્ટ આગામી સમયમાં તબક્કાવાર રીતે કાર્યાન્વિત કરવાનું કંપનીએ વિચાર્યું છે.

અમૂલ ડેરી તરીકે ઓળખવામાં આવતા આણંદ મિલ્‍ક યુનિયન લીમીટેડ (AMUL) દ્વારા આ પ્‍લાન્‍ટ શરૂ કરવા માટે ત્રિપક્ષીય કરાર કરવામાં આવ્યો છે. કરાર અંતર્ગત પ્રારંભિક તબક્કમાં તે પનીર અને ઘીનું ઉત્‍પાદન કરશે. આ માટે અમૂલ ન્‍યુ જર્સી સ્‍થિત એનઆરજી પિયુષ પટેલના ડેરીના પ્‍લાન્‍ટનો પ્રોડકટ માટે ઉપયોગ કરશે.

ન્યુ જર્સી પાસે અમૂલનો પ્લાન્ટ શરૂ થતા અમેરિકાના પુર્વ કિનારે મોટી સંખ્‍યામાં રહેતા ગુજરાતીઓ અને દક્ષિણ એશિયાના લોકો ને આવનારા થોડા સમયની અંદર ‘ટેસ્‍ટ ઓફ ઇન્‍ડિયા'નો સ્વાદ માણવા મળશે. આ પ્લાન્ટ વહેલી તકે શરૂ થાય તે માટે આયોજન કરી રહી છે.

આ અંગે અમૂલ ડેરીના સુત્રોના જણાવ્‍યા પ્રમાણે કંપની માટે પ્‍લાન્‍ટ વ્‍યુહાત્‍મક રીતે અનુકુળ છે. આ પ્‍લાન્‍ટ એવી જગ્‍યાએ છે કે જયાંથી તેમને કાચો માલ પણ મળી શકશે. વળી ન્‍યુજર્સી નજીક હોવાથી ભારતીય લોકોને લાભ મળી શકશે. અમેરિકામાં ઇન્‍ડિયન રેસ્‍ટોરન્‍ટમાં અમુલની પ્રોડકટની ઘણી ડિમાન્‍ડ છે. ન્યુ જર્સી સ્થિત ડેરી પ્લાન્ટમાં પ્રારંભિક તબક્કામાં અમૂલ દરરોજ 3 ટન પનીર અને 5 ટન ઘી બનાવવાનો ટાર્ગેટ રાખી રહી છે.