હાર્દિક પટેલનો ધડાકો, મોટા નેતાઓ ઈચ્છે છે કે હું પાર્ટી છોડી દઉ!

ગુજરાત કોંગ્રેસના કાર્યકારી અધ્યક્ષ હાર્દિક પટેલે ગુરુવારે આક્ષેપ કર્યો હતો કે પાર્ટીનું રાજ્ય નેતૃત્વ તેને પરેશાન કરી રહ્યું છે અને ઈચ્છે છે કે તે પાર્ટી છોડે.

અમદાવાદ : ગુજરાત કોંગ્રેસના કાર્યકારી અધ્યક્ષ હાર્દિક પટેલે ગુરુવારે આક્ષેપ કર્યો હતો કે પાર્ટીનું રાજ્ય નેતૃત્વ તેને પરેશાન કરી રહ્યું છે અને ઈચ્છે છે કે તે પાર્ટી છોડે. હાર્દિકે કહ્યું કે, તેના તરફથી કોંગ્રેસના પૂર્વ અધ્યક્ષ રાહુલ ગાંધીને તેમની સ્થિતિ વિશે ઘણી વખત જાણ કરવામાં આવી હતી, પરંતુ દુઃખની વાત છે કે કોઈ નિર્ણય લેવામાં આવ્યો ન હતો. તેમણે દાવો કર્યો કે છેલ્લા ત્રણ દાયકાથી ગુજરાતમાં કોંગ્રેસ સરકારની નિષ્ફળતા માટે આંતરિક જૂથવાદ અને અન્ય પક્ષો સાથેના સ્થાનિક કોંગ્રેસના નેતાઓનું ગુપ્ત જોડાણ જવાબદાર છે.

નવેમ્બર-ડિસેમ્બરમાં ગુજરાત વિધાનસભાની ચૂંટણી

હાર્દિકે દાવો કર્યો હતો કે 2017માં આટલું જોરદાર વાતાવરણ હતું, પરંતુ યોગ્ય ઉમેદવારોની પસંદગી ન થવાને કારણે સરકાર બની શકી નહીં. ગુજરાત વિધાનસભાની ચૂંટણીના થોડા મહિના પહેલા હાર્દિક પટેલે પાર્ટીના રાજ્ય નેતૃત્વ સામે ખુલ્લેઆમ બળવો કર્યો છે. રાજ્યમાં આ વર્ષે નવેમ્બર-ડિસેમ્બરમાં વિધાનસભાની ચૂંટણી યોજાવાની છે.

કોંગ્રેસના નેતાઓએ નબળા પાડ્યા

ગુજરાતમાં 27 વર્ષથી કોંગ્રેસ સત્તાથી દૂર છે. હાર્દિક પટેલે કહ્યું કે, 'અમે મોટું આંદોલન કરીને કોંગ્રેસને ફાયદો કરાવ્યો હતો. અમને લાગ્યું કે જ્યારે અમારી તાકાત અને કોંગ્રેસની તાકાત મળશે ત્યારે અમે રાજ્યને નવી સ્થિતિમાં લાવીશું. પરંતુ કોંગ્રેસના નેતાઓએ જ અમારી તાકાત નબળી પાડી.

ત્રણ વર્ષ કોઈ કામ ન અપાયું

હાર્દિકે વધુમાં કહ્યું કે, મને વર્કિંગ પ્રેસિડેન્ટ બનાવવામાં આવ્યો હતો, પરંતુ મારી પાસે કોઈ કામ નથી. મને કોઈ મહત્વની બેઠકમાં બોલાવવામાં આવતો નથી, મને કોઈ નિર્ણયમાં સહભાગી બનાવવામાં આવતો નથી. સવાલ એ છે કે કોંગ્રેસમાં કાર્યકારી પ્રમુખ શું છે? થોડી જવાબદારી આપવી જોઈએ, પરંતુ ત્રણ વર્ષ થઈ ગયા, કોઈ કામ આપવામાં આવ્યું નથી.

પાર્ટીની હાલત ખૂબ જ ખરાબ

હાર્દિકે કહ્યું કે, 'મારી નારાજગી ક્યાંય જવા માટે નથી. હું કહેવા માંગુ છું કે કંઈક સારું કરો. પાર્ટીની હાલત ખૂબ જ ખરાબ છે, જેઓ મજબૂત લડાઈ લડી રહ્યા છે, તેમને તક આપો, બધું એવા લોકો પર ટકે છે જેઓ કંઈ કરવા માંગતા નથી. લગભગ 30 વર્ષથી કોંગ્રેસની સરકાર બની નથી તો આ લોકોની ભૂલ સમજો. પાટીદાર સમાજના જાણીતા ચહેરા નરેશ પટેલ કોંગ્રેસમાં જોડાય તેવી શક્યતા અંગે હાર્દિક પટેલે જણાવ્યું હતું કે, કોંગ્રેસે સ્પષ્ટતા કરવી જોઈએ કે તેમની સાથે વાતચીત થઈ છે કે નહીં. આટલા દિવસોથી સમાચારો આવી રહ્યા છે, પરંતુ કંઈ જ કહેવામાં આવી રહ્યું નથી.

હાર્દિકે પોતાની જ પાર્ટી પર નિશાન સાધ્યું

પાર્ટી પર નિશાન સાધતા તેણે પૂછ્યું કે, '2017માં તમે હાર્દિકનો ઉપયોગ કરશો, 2022માં તમે નરેશ ભાઈનો ઉપયોગ કરશો અને 2027માં તમને નવો પટેલ મળશે? તમારી પાસે હાર્દિક છે, તો શા માટે તેને મજબૂત બનાવતા નથી? નરેશભાઈને લઈ જવા જોઈએ, પણ તેમની હાલત મારા જેવી તો નહીં હોય ને?' જ્યારે પૂછવામાં આવ્યું કે શું તેઓ કોંગ્રેસ છોડવાનું વિચારી રહ્યા છે તો કહ્યું કે, "હું અન્ય કોઈ પક્ષમાં જવા માંગતો નથી. પરંતુ ગુજરાત કોંગ્રેસમાં જેઓ મજબૂત નેતાઓ છે તેને હેરાન કરવામાં આવે છે, જેથી તે પાર્ટી છોડી દે.

English summary

Hardik Patel's blast, big leaders want me to leave the party!