મોડાસાનું એક અનોખુ મંદિર, જ્યાં પૂજાય છે ડુંગરની શીલા
મોડાસા, 11 નવેમ્બરઃ જ્યારે પણ મંદિરની વાત આવે એટલે આપણા માનસપટલ પર એક ચિત્ર આવી જાય છે, જેમાં મંદિરમાં મૂર્તિની પૂજા થતી હોય છે, પરંતુ ગુજરાતના અરવલ્લી જિલ્લામાં એક અનોખું મદિર આવેલું છે. જ્યાં મૂર્તિ નહીં પરંતુ શીલાની પૂજા કરવામાં આવે છે. મોડાસાના બોલુન્દ્રા પાસે ડુંગરની ટોચ પરથી શીલા નીચે ઉતર્યા બાદ આસ્થાથી તેની પૂજા કરવામાં આવે છે. ડુંગરેશી બાવજી તરીકે જાણીતા આ મંદિર મોટી માત્રામાં ભક્તો ઉમટે છે.
આ મંદિરને લઇને એક પૌરાણિક કહાણી છે. વર્ષો પહેલા ડુંગરમાં શીલા ઉપસ્થિત હતી અને તેની પૂજા કરવા માટે રોજ ગામની એક શ્રદ્ધાળું મહિલાને ડુંગર ચઢવો પડતો હતો. સમય જતાં મહિલા વૃદ્ધ થતા તે ડુંગર પર ચઢી શકતી ન હોવાથી પોતાના આરાધ્ય દેવને આ વૃદ્ધ મહિલાએ પ્રાર્થના કરી કે ડુંગરેશી બાવજી તમારું સત હોય અને મારી ભક્તિ સાચી હોય તો તમે કાલે નીચે આવી જજો. બીજા દિવસે જાણે કે ચમત્કાર સર્જાયો હોય તે રીતે ડુંગર પરની શીલા તળેટીમાં હતી.