Zoho Mail : ગુજરાતની તમામ સરકારી કચેરીઓમાં હવે Zoho Mail નો ઉપયોગ થશે

Zoho Mail : ગુજરાત સરકારે ડિજિટલ સ્તરે આત્મનિર્ભર ભારત અભિયાનને આગળ વધારતા એક મોટો નિર્ણય લીધો છે. રાજ્યના વિજ્ઞાન અને ટેકનોલોજી વિભાગે એક પરિપત્ર જાહેર કર્યો છે.

આ પત્રમાં તમામ સરકારી વિભાગો અને તેની હેઠળની કચેરીઓને તાત્કાલિક અસરથી Zoho Mail (ઝોહો મેઇલ) સર્વિસનો ઉપયોગ શરૂ કરવા આદેશ આપ્યો છે. આ નિર્ણય દ્વારા રાજ્યના ઈમેલ સંચારને સ્વદેશી પ્લેટફોર્મ પર શિફ્ટ કરવામાં આવશે.

વિજ્ઞાન અને ટેકનોલોજી વિભાગના સચિવ, પી. ભારતીએ આ સરકારી નિર્ણયની પુષ્ટિ કરી છે. કેન્દ્ર સરકારના દિશાનિર્દેશો મુજબ અને દેશી ટેકનોલોજીને પ્રોત્સાહન આપવાના ભાગરૂપે ગુજરાત સરકારે આ પગલું ભર્યું છે.

ઉલ્લેખનીય છે કે, કેન્દ્રીય ગૃહમંત્રી અમિત શાહે પણ આ સ્વદેશી ઈમેલ સેવાનો ઉપયોગ શરૂ કર્યા બાદ ગુજરાત સરકારે રાજ્ય સ્તરે તેને અમલમાં મૂકવાનો સત્તાવાર નિર્ણય કર્યો છે.

Zoho Mai એક સંપૂર્ણ ભારતીય ઈમેલ સર્વિસ છે, જે ડેટા સુરક્ષા અને પ્રાઇવસીની દ્રષ્ટિએ વિશ્વસનીય માનવામાં આવે છે. વિદેશી ઈમેલ પ્લેટફોર્મ પરની નિર્ભરતા ઘટાડવા અને સંવેદનશીલ સરકારી ડેટાને દેશની સરહદોમાં જ સુરક્ષિત રાખવાના ઉદ્દેશથી આ શિફ્ટિંગ મહત્વપૂર્ણ છે. આ પગલું ટેકનોલોજી ક્ષેત્રે પણ વોકલ ફોર લોકલના વિચારને પ્રોત્સાહન આપે છે.

English summary

Zoho Mail: Gujarat Government Mandates Switch to Indigenous Indian Email Service for All Offices