દેશની પહેલી હાઇસ્પીડ ટ્રેનનું સફળ ટ્રાયલ, 100 મિનિટમાં પહોંચી દિલ્હીથી આગરા

Updated: Tuesday, February 10, 2015, 10:10 [IST]

નવી દિલ્હી, 3 જુલાઇ: દિલ્હીથી આગરા સુધી 160 કિલોમીટર પ્રતિ કલાકની સ્પીડથી દોડનારી સેમી હાઇ-સ્પીડ ટ્રેનનું પરીક્ષણ ગુરુવારે સફળતાથી કરવામાં આવ્યું. આ ટ્રેન ગુરુવારે સવારે 11.15 કલાકે નવી દિલ્હી રેલવે સ્ટેશનથી આગરા માટે રવાના થઇ. જાણકારી અનુસાર, બપોરે 12.55 કલાકે ટ્રેન આગરા પહોંચી ગઇ.

આજે નવી દિલ્હી રેલવે સ્ટેશનથી આ ટ્રેનને લીલી ઝંડી બતાવીને રવાના કરવામાં આવી હતી. પહેલા આ ટ્રેનને 90 મિનિટમાં આગરા પહોંચાડવાનું નક્કી કરવામાં આવ્યું હતું, પરંતુ તેને આ અંતર કાપવામાં 100 મિનિટ જેટલો સમય લાગી ગયો. અત્રે નોંધનીય છે કે રેલવે નવેમ્બર મહીનામાં દિલ્હીથી આગરાની વચ્ચે આ ટ્રેનની ઔપચારીક શરૂઆત કરવાની છે.

લગભગ 5400 એચપી ઇલેક્ટ્રિક લોકોમોટિવથી સજ્જ આ ટ્રેન આજે સવારે નવી દિલ્હી રેલવે સ્ટેશનથી રવાના થઇ હતી. રેલવે સંરક્ષા અધિકારી પીકે વાજપેઇ, દિલ્હી અને આગરાના મંડળ રેલ પ્રબંધક અને સેમી-હાઇ સ્પીડ પરિયોજના સાથે જોડાયેલા અધિકારી સવાર હતા.

દિલ્હીના મંડલ રેલ મેનેજર અનુરાગ સચાને જણાવ્યું કે દિલ્હી અને આગરાની વચ્ચે 160 કિલોમીટર પ્રતિ કલાકની સ્પીડથી ટ્રેનનું પરીક્ષણ થશે. આ વિશેષ ટ્રેનમાં 10 ડબ્બા લાગેલા છે. આજે જ પાછા ફરવાની યાત્રા પણ કરવામાં આવશે. પરીક્ષણ યોગ્ય રીતે સંપન્ન કરવા માટે આરપીએફના જવાનને પણ ખડે પગે રખાયા હતા.

સચાને જણાવ્યું કે દિલ્હી-આગરા માર્ગ પર લગભગ 16 સ્થાન એવા છે જ્યાં થોડા ભીડભાડવાળા છે, તે વિસ્તારમાં લોકોને દૂર કરવા જરૂરી છે જેથી કોઇ ઘટના ના સર્જાય. હાલમાં ભોપાલ શતાબ્દી એક્સપ્રેસ આ માર્ગ પર મોટાભાગે 150 કિલોમીટર પ્રતિ કલાકની સ્પીડથી ચાલી રહી છે.