સરકાર પાડવા ઇચ્છતા હતા યુપીએના એક નેતાઃ ગડકરી

By Super

Updated: Tuesday, February 10, 2015, 15:33 [IST]

નવી દિલ્હી, 12 એપ્રિલઃ એક પ્રભાવશાળી નેતાએ યુપીએ સરકાર 2ને પાડવા માટે ભાજપના પૂર્વ અધ્યક્ષ નીતિન ગડકરીની મદદ માંગી હતી. આ ખુલાસો નીતિન ગડકરીએ જાતે જ કર્યો છે. એક ખાનગી ચેનલને આપેલા તેમના આ પ્રકારના નિવેદનથી રાજકીય માહોલમાં ગરમાવો આવી ગયો છે.

ગડકરીએ કહ્યું કે હું જે નેતાની વાત કરી રહ્યો છું તે, રાજકારણની એક મોટી હસ્તી છે અને તે એકલાં જ કેન્દ્ર સરકારને પાડવા માટે સક્ષમ છે. સાથે જ ગડકરીએ કહ્યું કે મે તેમના મદદના પ્રસ્તાવને ઠુકરાવી દીધો હતો.

જો કે, ગડકરીએ એ નેતાનું નામ જણાવ્યું નથી અને સાથે જ એ પણ નથી જણાવ્યું કે જો એ નેતા આટલા જ પ્રભાવશાળી નેતા છે તો પછી તેમણે સરકાર પાડવાનું પગલું હજુ સુધી ભર્યું કેમ નથી. પૂર્વ ભાજપ અધ્યક્ષે એ પણ નથી કે એ નેતાએ તેમનો સંપર્ક ક્યારે કર્યો હતો.

નોંધનીય છે કે અત્રે એ પ્રશ્ન ઉદભવી રહ્યો છે કે જો ગડકરીને એ વાતની ખબર હતી તો પછી તેમણે પહેલાં આ અંગે કેમ કંઇ ના કહ્યું અને સાથે જ હવે ગડકરી એ નેતાનું નામ કેમ લઇ રહ્યાં નથી.